154. Cam:

Duenz mwngz coenz daihseiq,

Gaiq maz seih seiq nga?

Beix rox nuengx couh hoiz,

Gaiq maz bya doengz dog?

Hoiz:

Aencongz le beix ha,

Gaiq de seih seiq nga,

Aendaengq le beix ha,

Gaiq de bya doengz dog.

155. Cam:

Duenz mwngz coenz daihhaj,

Gaiq maz mbin daemj mbwn?

Beix rox nuengx couh hoiz,

Gaiq maz mbin daengz deih?

Hoiz:

Cib nyied vunz haeuj vax,

Mojlox mbin daemj mbwn,

Seiq nyied fwn doek hung,

Loengxlungz mbin daengz deih.

156. Cam:

Duenz mwngz coenz daihroek,

Mbwn boek deih cij fan,

Beix rox nuengx couh hoiz,

Mbwn fan deih lij luenh.

Hoiz:

Vunz cae reih boegboeg,

Mbwn boek deih cij fan,

Vunz dawz naz haeplangh,

Mbwn fan deih lij luenh.

157. Cam:

Duenz mwngz coenz daihbet,

Em’et diuz doiq diuz,

Beix rox nuengx couh hoiz,

Emgiu hoh doiq hoh.

Hoiz:

Cib lwgfwngz cayet,

Em’et diuz doiq diuz,

Cib lwgfwngz cayiu,

Emgiu hoh doiq hoh.

（22）