Vangz Meijli ngamq hwnj song dangz goq yijvwnz sat, de gaem bonjsaw, dingj aen ndang naetnaiq bonjfaenh, yamq faj din naeknw byaij haeuj bangunghsiz, swiq fwngz, dauj raemx, gwn raemx. De hoz humz bak hawq, daengx ndang unqnemnem, gaenq dwgliengz ndaej geij ngoenz lo. De mbouj siengj cingjgyaj, hwnj dangz goq yijvwnz aeu doegsaw hix lai, song dangz roengzdaeuj, hoz in raixcaix, neix doiq de daeuj gangj mbouj suenq maz saeh lo. Miz geij boux hagseng gaen haeujdaeuj cam de di saeh, de doq swiq fwngz doq dingq gyoengqde gangj, ngeix le youh lwnh gyoengqde nyi.

Doiqnaj Loz lauxsae caeuq Veiz lauxsae cingq sing daemqnamnam gangjgoj, lumjnaeuz dwg lwnh gij gaujhwz bi 2021 youh daengz lo, gvendaengz gij saeh bingz maenhndei. Raen Vangz Meijli haeujdaeuj couh bienq sing engq daemq lo, menhmenh couh mbouj gangj lo, caez naengh ndei gag boux gaij cozyez.

Roengzhag le, Vangz Meijli cingq yaek byaij ok bakdou hagdangz dauqranz. Sawqmwh miz sing heuh de:“Meijli, caj gou yaep he!”

Vangz Meijli baenqgyaeuj baez yawj, dwg Lungz lauxsae, caeuq de caez son ban ndeu, de son suyoz. Lungz lauxsae lij miz song bi couh yaek duiyouh lo. Songde doengzcaez doxgap son ban ndeu geij bi, gamj- cingz gig ndei.

“Dahcej, miz saeh maz?” Vangz Meijli daengx roengzdaeuj, caj Lungz lauxsae daengz gyawj.

“Mbouj miz saeh couh mbouj ndaej caeuq mwngz gangj geij coenz ha? Songraeuz caez byaij, doq byaij doq gangj ba.”

“Meijli, mwngz baenzngoenz couh rox bwh go hwnjdangz、haeujsim gij saeh hagseng, couh mbouj ndaej- hoengq naemjnaemj gij saeh swhgeij ha? Gij gaujhwz bi 2021 bingz maenhndei youh daengz lo, byawz ndaej bingz hwnj doiq bingz cizcwngh mizyungh nw.” Lungz lauxsae itcig gangj.

“Gij saeh neix lij aeu naemj ha? Yienghneix buekmingh guhhong hix dwg vih bineix bingz cizcwngh fugauh, siengj bineix baez ndeu couh bingz ndaej.” Vangz Meijli naeuz.

“Mwngz caen huk, mbouj doenghdoengh uk baenzlawz ndaej ni, hawj gou vix diuz roen hawj mwngz, baujcingq mwngz bineix ndaej swnh- leih.” Lungz lauxsae dwg boux ndaej binienz, maz cungj rox di.

“Dahcej, bingz maenhndei mbouj dwg hagdangz raeuz liglaiz gaengawq gak fuengmienh lauxsae daeuj bingz ha? Gou siengj bi 2021 daeuj gou hix guh ndaej haujlai cingzcik, bingz maenhndei wngdang ndaej bingz hwnj.” Vangz Meijli gig gagsaenq.

“Naeuz mwngz huk, mwngz caen huk. Bineix yijvwnz cuj sou Loz lauxsae caeuq Veiz lauxsae caemh aeu bingz gij cizcwngh fugauh, songde caeuq mwngz dwg duisouj bw, gangj daeuj gij cingzcik songde mbouj beij mwngz, hoeng gou dingqgangj geij bi neix daeuj songde caeuq yaucangj byaij ndaej gaenh, binaengz gvaq ciet cungj gyaez bae ranz yaucangj, soengq di doxgaiq.”

“Dahcej, mwngz hix lai dawz haeujsim luba, songraeuz hix bungz ciet gvaq cieng mwngz bae gou dauq, byawz mbouj miz di cingzngeih ne.”

“Mwngz mbouj rox. Dingq dahcej coenzvah, gaxgonq gou hix lumj mwngz yienghyiengh ak gvaq vunz, hoeng bingz maenhndei seiz coengz- laiz mbouj ndaej gvaq. Seizhaenx hix lumj mwngz nei mbouj rox saeh, bibi naengh caj bingz maenhndei, bibi doek, gyoengq boux yaez gvaq gou cungj ndaej lo. Doeklaeng gou cij rox, mboujdan aeu miz cingzcik, lij aeu miz cingzngeih, baenzlawz caeuq lingjdauj rag gaenh gamjcingz, gaenx caeuq lingjdauj baedauq. Bi daihseiq daengz ndwencieng gou hix bae ranz yaucangj yawjyawj, bae baihrog hagsib dauqma cawx di doxgaiq soengq hawj de. Yienghneix bide gou couh ndaej bingz hwnj maenhndei lo.”

（1）