Cibgouj Gaiq roek cung,

Daez cib aen genhciz,

Cib aen genhciz ndei,

Aenaen seih(dwg) dijbauj.

Cib aen genhciz ndei,

Aenaen fwn seiqgeiq,

Gyawz miz fwn seiqgeiq,

Ciengxlwenx seih(dwg) seizcin.

Cungguek suenva hung,

Seiqgeiq fwn daeuj rwed,

Fwn roengz daengz gak dieg,

Faexdiet hix hai va.

Fwn roengz daengz ndawbya,

Rin bya hai vamoq,

Dangj hai fuzbinzloh,

Doeng doh ranz lwgminz.

Fwn roengz daengz ndawdah,

Byalah bienq vuengzhouz,

Lungz Cungguek ngiengx gyaeuj,

Okbae youz seiqhaij.

Fwn roengz daengz ndawdaemz,

Raemxgyaeng bienq raemxmboq,

Gaijgwz hai bokdoh,

Gim ngaenz mboq riuz ma.

Fwn roengz daengz lajmbanj,

Ranzranz miz laeuz sang,

Gizgiz bienq diendangz,

Saedceij van gvaq oij.

Fwn roengz daengz ndawnaz,

Haeux hai va miz ngveih,

Guhhong yungh gihgi,

Vaiz yienjheiq guhfwen.

Fwn roengz doh cienz goz,

Minzcuz gangj doxgiet,

Ndongj baenz rin caeuq diet,

Doxgiet dangj seiqhenz.

Fwn roengz daengz ndawranz,

Mbouj daem yangz muh mba,

Hongranz dengiva,

Goeng’yah hoengq diuqfoux.

Fwn roengz daengz gwnzdaiz,

Bienqbaenz ngaiz caeuq noh,

Cienz ranz riuhoho,

Laux iq coz yiengjfuk.

Fwn roengz daengz gwnzgai,

Doenghyiengh gai baenzbyoz,

Bae haw vunz ndaetndoq,

Lumj rwidoq coh va.

Fwn roengz daengz byafwz,

Gizgiz gwq va moq,

Gyaeundei raeuz guekcoj,

Ngoenzcog moq gvaq neix.

Fwn roengz daengz lohbya,

Ci ma doengz doq mbin,

Nungzminz ndaej duetbinz,

Bae Baekging guhcaemz.

Fwn roengz daengz ndawhaij,

Ruzhaij byaij mbouj dingz,

Bauj guekminz anningz,

Lajmbwn vunz caez haenh.

Fwn roengz youq gwnzmbwn,

Gwnzmbwn ndaem haeuxyangz,

Aenmbwn baenzneix gvangq,

Ndei langh geiz Cungguek.

Fwn roengz doh seiqgyaiq,

“It rangh it loh” ndei,

Baengzyoux daeuj ndaej deih,

Cawxgai caez canh ngaenz.

Fwn roengz daengz ndawsim,

Ndawsim mboeng baenz faiq,

Riengz aendangj bae byaij,

Fanh daih mbouj ndaej lumz.

Cib genhciz ndei lai,

Raeuz fanh daih aeu geiq,

Dangj roengz fwn seiqgeiq,

Ciengxlwenx miz vuenyungz.