Gwnzfaex duzroeg heuhcican,

Saehndei haeuj ranz angqfaengfaeng;

Sam nyied cosam youh daeuj daengz,

Caez guh haeuxnaengj dumq gyaeq eq(hoengz).

Ngoenzneix youh daengz Sam Nyied Sam,

Bouxboux sim van baenz oijmoih;

Youq gyang Namzningz guh fwendoiq,

Bouxlaux bouxnoih(iq) caez daeuj ngonz.

Vadauz hai hoengz vamaenj hau,

Sam nyied dauq daengz ngoenz cosam;

Lwglan Mbanjcuengh caez sim van,

Mbouj guh fwen han sim mbouj onj

Lajmbwn ceiq raemh dwg faexcid,

Baklinx ceiq lik(giuj) vunz Guengjsae;

Dauqcawq canghfwen caeuq canghbeij,

Fwen lae cien leix bae mbouj duenh.

Miz raemx miz raiz va cij hoengz,

Miz namh miz ndoeng faex cij mwn;

Haeuxreih haeuxnaz ciengx vunz gwn,

Beijmbanj beijgun caux lienghleih.

Duzlungz ceiq maij raemx haij laeg,

Duzfungh ceiq naek(maij) haeuj ndoeng mwn;

Sam nyied beij fwen ceiq maez vunz,

Boux youq biengz wnq lij buet daeuj.

Gij roeg ceiq gyaeu dwg duzfungh,

Gij va fuzyungz vunz ceiq maij;

Guengjsae sam nyied baenz fwenhaij,

Seiq fueng bet baih vunz daeuj coh.

Beij fwen doiqciengq bibi miz,

Hawfwen gizgiz hai sing lengj;

Aeu fwen cienz cingz doengzcaez ciengq,

Vunzlai doxciengj hwnj godaiz.

Gyoengqraeuz docih Dangjcunghyangh,

Swnghhoz siujgangh van raixcaix;

Dangj raeuz youh hai Ngeihcib Daih,

Naemj aeu gaiqgaiq engqgya ndei.

Gou vih guekcoj raeuz angqyangz,

Bouxminz vih(diegvih) sang gangj mbouj liux;

Binghraq gwnzbiengz deng gyaep deuz,

Beksingq caez heuh ndei dahraix.

Dangj raeuz lingjdauj mbouj bingzciengz,

Cungj vih gwnzbiengz caux fukheiq;

Mbouj lwnh bouxhung rox bouxnyaeq,

Aeu sim hoengzmaeq riengz dangj byaij.

Angq gvaq ngoenzndei buetyouyou,

Guek raeuz minz fouq vunz sim van;

Doxgiet haenqguh doengz fazcanj,

Ciengxlwenx mbouj anj(baeg) miz goengrengz.

Mbanjcuengh cietgo gyong laz yiengj,

Gwnz laj beijfwen goenjfofo;

Ciengq go diuqfoux daeuj angqhoh,

Cien roen fanh loh ndwethumhum.

Cin daeuj va hai fwen lumj haij,

Neiyungz cingcaij biengz hoengzoq;

Yamq din byaij haeuj seizdaih moq,

Eufwen gangjgoj daeuj danqhaenh.

Laeuj ndei laeuj van dawz daeuj gingq,

Beijfwen ndeidingq ciengq mbouj caez;

Cingzngeih naekna ciengzseiz geiq,

Baengzyoux seizseiz cungj doxniemh.

Lwgmbauq lwgsau bae bo cunz,

Bouxboux riunyum lumj va hai;

Beijfwen yied eu yied miz lai,

Va hai mbouj byaiz cingz mbouj duenh.

Faex sang cien cik mbouj liz rag,

Lwgmak hunghag mbouj liz gaeu;

Mbanjcuengh gizgiz fwen ndwetdouq,

Liuz Samcej raeuz mbouj ndaej lumz.

Lajmbanj hwngvuengh ceiq habsim,

Dangj vih bouxminz laeb goenglauz;

Caux guh fazcanj mbouj doenghngauz,

Doengh go vadauz hoengz rim deih.

Lajmbanj fazcanj biengz cix ak,

Ndaem haeux ndaem mak caiq ndaem byaek;

Ciengx mou ciengx gaeq youh fat raet,

Gyanghaemh gyanghaet mbouj you maz.

Baengh dangj hawj fwed raeuz ndaej mbin,

Baengh guek hawj din raeuz byaij gyae;

Sevei cujyi cwngcwz ndei,

Ranzranz cij ndaej bienq fouqmiz.

Bya raemx miz cingz vunz miz eiq,

Va hai ciengzseiz ronghcancan;

Ngoenzngoenz ciengq go youq mbanjranz,

Bouxboux bak van lumj dangzrwi.