De dwg boux “mbouj fugheiq” ndeu, cijaeu bouxwnq naeuz de, de mboujdwg “hw” sing ndeu baenq gyaeuj gvaqbae, mbouj han vunz, couhdwg mbouj guhsing, ndawsim gig mbouj fugheiq.

Miz ngoenz ndeu, de cingq naengh youq ndaw rug yawjsaw, daxmeh byaij haeujdaeuj, yawjraen naj de liz saw gyawj lai, couh bek aen mbaq de, naeuz: “Gaej liz saw gyawj lai, lwgda aiq vaih bw.” De doiq neix gig mbouj fugheiq, ndawsim siengj: “Gou baengh maz dingq mwngz? Gou liz saw baenzneix gyawj, mbouj dwg mbouj miz maz yingjyangj ma!”

Banringz, de cingq sij cozyez, daxboh menh- ywdywd byaij haeujdaeuj, yawjyawj gaiq bit ndaw fwngz de, ngauzngauz gyaeuj, naeuz: “Bit gaej gaem baenz dinj, fwngz yaek liz bakbit conq ndeu!” Gangj sat, youh menhywdywd byaij ok rug bae. De mbwnj aen bak: Gijmaz ha? Gou baenzneix gaem bit cij dwg ceiq cwxcaih, sij ok gij cih haenx hix gig ndeiyawj ha!

Banhaemh, de ninz youq gwnz mbonq yawjsaw, daegnuengx raen le, couh buet gvaqdaeuj naeuz: “Dahcej, daxmeh naeuz gvaq, mbouj ndaej ninz dwk yawjsaw bw!” Gangj sat, de couh bae guhcaemz lo. De saepsangsang “hw” sing ndeu coh daegnuengx: Lwgnyez guenj maz saeh lo, guhcaemz mwngz bae!

Ngoenz ndeu, de cingq yawj bonj cazci ndeu, sawqmwh, de roxnyinh baihnaj miz di mong, raeblaeng hix miz di naet. Doeklaeng, de bae genjcaz aen da de, raen lwgda ginsi youh gyanaek lo. De fwt rox lo: Laxlawz vunz ndaw ranz daezsingj de dwg deng bw, yienghneix, de couh aeu sibgvenq mbouj ndei baenz yiengh baenz yiengh gaij gvaqdaeuj.

“Mbouj fugheiq” aiq dwg gou, hix aiq dwg mwngz. Yienznaeuz raeuz moix boux vunz cungj miz mwh mbouj fugheiq, hoeng raeuz itdingh hag rox duenqdingh, fazyangz gij ndei, roengzrengz gaij gij yaez bae, yienghneix cij ndaej sawj swhgeij engqgya maenhndei!

(Suhcouh Si Gauhsinh Gih Swhsanh Sizyen Siujyoz Vangh Hihdingz)