Ndit ndatfwdfwd cik dwk daih- deih, daemz ngaeux caemrwg mizseiz cienz daeuj geij sing goep hemq, sing “bumlum” ndeu dwk byoengq cungj caemrwd neix, naed ceh ndeu doek roengz daemz bae, caem roengz naezngawh bae.

De dwg ceh va’ngaeux—— cehngaeux. De deng limqva gyaeundei humxdawz gvaq, moix ngoenz gwn gij raemxgiengh raemxraiz oemq baenz haenx, angqcoux geu ndit daih’it gyanghaet, lumj gunghcuj iq youq giz sang, naengh youq gwnz diegnaengh dijbauj va’ngaeux de.

Hoeng de seizneix, lumj daj dat sangswd doek roengz daej daemz laeprau haeunaeuh nei. De cugcak sawq fouz hwnj naj raemx, hoeng naezngawh niunwk lumj baenz gaiq baenz gaiq fwngz ndaemyamq nei aeu de daj gwnz diendangz rag roengz lajyaem bae.

Daej daemz maj rim go mez, gyoengqde cungj riu de: “Suenq luba! Mwngz mbouj ok ndaej bae law, mwngz couh lumj dou nei cwxcaih onjdangq ninz youq gizneix ba.”

“Mbouj, gou dwg cehngaeux, dwg va’ngaeux, dwg va couh yaek didngaz!” De roengzrengz caenx ok naeng heu swhgeij, iet ok geij diuz rag iq, dwgrengz cab roengz naez bae.

Daj ngoenzde hwnj, de itmienh damsim supaeu moix di yingzyangj henz ndang, itmienh iet ok engq lai rag iq cab roengz naez giz engq gyae bae. Couh yienghneix, naed ceh- ngaeux mbouj haeuj da ndeu couh hainduj menhmenh majhung lo.

Gij ronghsag miznaj doenghbaez gaenq gvaqbae lo, diuz loh seizneix yienznaeuz dwgrengz, hoeng de gien- saenq, miz ngoenz ndeu, de itdingh ndaej dauq raen daengngoenz. De ndonj aen gyaeuj, moix ngoenz mbouj dingz maj coh gwnz. Menhmenh dwk, de gaenq maj baenz diuz ganj maenghcangq ndeu, roxnyinh dingj gyaeuj yied daeuj yied rongh, yienghneix, de iet ok mbaw oiq ndeu, cungjsuenq ndonj ok naj raemx lo.

De angq dwk naeuz: “Ndei lai lo, gou gaenq okdaeuj lo, itdingh hai ok va daeuj.”

Go mez laj din ciuqyiengh mbouj yienghneix yawj:“Hw! Mboujgvaq dwg mbaw oiq ndeu, dwg dingj mbouj ndaej rumz ci fwn rwed bw.”

De dingq le, cij dwg dinghdingh baenq aen ndang, roengzrengz iet mbaw oiq de. Mbaw oiq supaeu ndit gaeuqgaeuq bae, ciepsouh rumz ci fwn rwed.

Youq ngoenz gyanghaet ndit ronghsagsag ndeu, aen valup nem rim raemxraiz ndeu menhmenh hai ok. Raq rumz iq ndeu ci gvaq, de yaengyaeng bidoengh, byoq ok baenz raq baenz raq feihhom. Naj coh daengngoenz, de loh’ok riunyumj lumj gunghcuj nei hawj vunz haeujmaez.

(Huzbwz Swngj Vujhan Si Cangzcingh Daih’it Yozyau roek nienzgaep Sunh Gingjvwnz)