广西农村人居环境全面提升 2022年农村危房改造年度竣工任务全部完成

Gicej daj Swcigih Yanghcunh Cinhinghgiz cam rox, 2022 nienz, Gvangjsih laebdaeb guh ndei dieg vunz youq lajmbanj gensez, gak hangh yinvu muzbyauh cienzbouh guhbaenz ndeiraeuh. Ndawde, gij nienzdoh yinvu gaijcauh ranzvaih lajmbanj 2022 nienz gaenq cienzbouh guh- baenz, ngaenz cunghyangh bangbouj gaijcauh ranzvaih lajmbanj gaenq 100% cei okbae, cikyauq bingzgyaq ngaenz bangbouj gaijcauh ranzvaih lajmbanj Gvangjsih youq daengx guek baiz baihnaj. Daengx gih gyoebsuenq guhbaenz 723 aen sezsih cawqleix raemxuq, dieg vunz youq lajmbanj cienzmienh gaijndei.

Laebdaeb gaijcauh ranzvaih lajmbanj. Couz ngaenz bangbouj gaij- cauh ranzvaih lajmbanj cunghyangh caeuq swcigih bonjgaep 1.63 ik maenz, bang daengx gih lajmbanj 5502 hoh gaijcauh ranzvaih, bauj hawj lajmbanj gyoengq boux souhaeuj noix ndaej youq aenranz maenh; couz ngaenz 0.39 ik maenz, bang 8 aen yienh henzguek gaijcauh ranzvax yaez, hawj vunz henzguek ndaej youq ranz ndei, caepmaenh hwngfat aen yiengh ndei minzcuz doxgiet、ndaw biengz onjdngh、henzguek anningz.

Gyarengz hwnqguh aen cawqleix raemxuq. Roengz ngaenz 1.6 ik maenz, hawj mizgven yienh gih guh lajmbanj raemxuq gwndaenj ceihleix gunghcwngz、gaijcauh diengzhaex gunghcwngz. Doengzseiz, couz ngaenz 23.72 ik maenz, cihciz daengx gih hwnqguh cin gaep cawqleix raemxuq sezsih caeuq veizhoh dem. Daengz 2022 nienz, daengx gih guhbaenz 723 aen cawqleix raemxuq cin gaep, baenz daengx guek aen swngjgih daihcaet、sihbu digih aen swngjgih daihngeih guhbaenz “si-yienh-cin”sam gaep raemxuq cawqleix dijhi.

Miz bouhloh guh singz mbanj nyapnyaj gwndaenj cawqleix. Couz ngaenz hanghmoeg hong sawqdiemj nyapnyaj gwndaenj faenloih 1800 fanh maenz guh hong cawqleix nyapnyaj gwndaenj, 2021 nienz dingh roengz aeu guh 59 aen yanghcin(bengih) nyapnyaj cungcienj、102 aen cawqleix nyapnyaj cunh gaep cienzbouh guhbaenz, 2022 nienz dingh roengz 370 aen hanghmoeg lajmbanj cawq- leix(cienjdaeh) nyapnyaj gwndaenj cienzbouh haigoeng hwnqguh.

(Vangz Yenginz Dwng Cujdij/王艳群 邓祖体)