Ndaw mbanj gou miz yahgeq he, heuhguh Yahmbej. Yah neix bingzseiz gangj vah dangq okroet nei, mbouj gvaq ukgyaeuj couh bongh okdaeuj.

Miz ngoenz he, de bae doengh mbwn laep cij dauqranz, de dwk gaeq haeuj roengq bae seiz, ra duz gaeqboh he mbouj raen, de couh ok doulaeng bae, daen ndaq naeuz:“Haemhneix bouxlawz aeu duz gaeq gou bae, cienz ranz baenz hozfoeg、hozbop、hoznaeuh liux bae, ciuhneix cungj mbouj ndei gvaq ciuh……” Gij maz vahdoeg de cungj ndaq liux ndaq caenh.

Ngoenz daihngeih haetromh, Yahmbej bae ndawsuen mbaet byaek, raen duz gaeqboh de dai youq ndaw cingjraemx. De baez yawjraen, doeksaet yat, de riuj duz gaeq de hwnjdaeuj, gag gangjnyumnyum naeuz:“Duzgaeq baenzneix hung lij doek cingj dai, caen geizheih bw.”

Goeng ranz gwnz de ndaejnyi le, couh byaij gvaqdaeuj, riunyubnyub naeuz:“Gij vah haemhlwenz mwngz daen ndaq vunz haenx, deng sou boh、meh、lwg geij boux gak rap lo.”

Yahmbej dingq le, naj raezrangrang, ngoemqngwtngwt byaij haeuj ndawranz bae lo.