“Gu——gu——gu——” Riengzlaeng gij sing heuh baenzrangh, rouh gaeq duz nyaeq duz hung he ciengj gonq lau laeng daj gwnzbya bongh mbin roengzdaeuj heux youq henz ndang bohmeh gou cacoemj dot gwn.

Geij duz mbiengj baihde diuq mbin hwnjdaeuj, daj ndaek rinhung gwnz byai go’ndoek mbin roengzdaeuj, gij bwn henjgim youq laj ndit ingj ndaej daegbied lwenqda. Nanzgvaiq doengh bouxdaeuz youq aen gunghswh moix bi cungj caeuq ranz gou dingh aeu gaeqiem gvaq ndwencieng. Ngonz raen bohmeh gueng gaeq baenzneix haisim, gou mbouj rox mbouj nyinh gag mbon aen soujgih okdaeuj——

Mbanjcukeij, neix dwg aen mbanj Bouxcuengh comzyouq cij miz song bak lai vunz, gij yiengh goengq bya laeng mbanj haemq lumj daengqeij, go’ndoek gwnz bya daengx bi seiqgeiq cungj heufwdfwd, baenzneix aen mbanj neix couh heuhguh Mbanjcukeij. Aen ranzlaeuz gou couh guh youq cungqgyang ndawmbanj, aen ranzgaeq guh youq laj goek dinbya henz suenbyaek. Ranz gou moix bi cungj ciengx miz bak lai duz gaeqdoj, bohmeh haeujsim dajciengx, gaeuq ngoenznaengz caeuq gvaq ciet ndawranz gaj gwn, caemhcaiq daengz ndwencieng lij ndaej gai geijcib duz gaeqiem ne.

Baenzngoenz daxboh daxmeh couh gueng di haeuxgok、haeuxyangz、gij byaekheu ndaw suen、gij haeux lw byaek lw…… Moix ngoenz lij langh duzgaeq hwnj gwnzbya bae gag ra gwn dem, gij nohgaeq ranz gou haengjdingh ndeigwn bw. Daxboh lij naeuz langh duzgaeq dwk gwnzbya bae lij ndaej coengh vunzraeuz cawz “seiqhaih” ne!

Mbouj lwnh mwngz mbouj rox, doengh gij gaeqdoj ranz gou cungj dwg duz gaeqmeh gag faeg gyaeq byoeng okdaeuj bw, cibgeij duz gaeqmeh bomz youq gizde. Daxmeh cungj anbaiz ndaej ndei, mboujguenj seiznit seizndat, rouh nem rouh byoeng okdaeuj, hawj duz de doxdam roengzbae, mwngz yawj: Gaeqhung、gaeqlwg、gaeqgeq、gaeqoiq、gaeqboux、gaeqmeh、gaeqiem、gaeqhangh, cijaeu mwngz gyaez, siengj gwn maz feihdauh, daj song gaen buenq daengz haj gaen buenq ndawde, mwngz vix daengz duz lawz, daxboh gou itdingh iet fwngz couh dawz ndaej hawj mwngz. Couh baengh gij gingniemh ciengx gaeq daxboh gou, ciengx gij gaeqiem haenx coengzlaiz mbouj miz mauhgvaq roek gaen naek, gwn lai di hix mbouj roxnyinh nywnx. Daxboh angq naeuz, huq ndei mbouj caih lai, ciengx miz bak lai duz couh ndaej lo, doenghgij gyaeqgaeq faeg mbouj liux dawz daeuj cawj dang roxnaeuz cien gwn youh dwg lingh cungj feihdauh!

“Bouxlaux dwg aen bauj ndawranz”, caen gangj ndaej deng! Yienznaeuz daxboh daxmeh gou gaenq ndaej betcib bi doxbae lo, ndangdaej lij cangqcwtcwt. Daxboh ciengz naeuz:“Lwglan gaenq majhung liux, hix cungj miz hong guh lo, dou song bouxlaux ngoenznaengz gag youq ndawranz hix mbwq lai, dwkbaiz、dwkgeiz、dingq fwen、ngonz densi mbwq le, gizneix gizde guh saekdi hongfwngz, ietiet hwet, ngauzngauz ndang, dauq roxnyinh ndangdaej engq soengswt.” Daxmeh hix gangj gij “ging ciengx ndang” de: Guhhong couhdwg cungj lienhndang ndeu！Seizneix ndaw suen gaenq ciep ndaej swlaizsuij haeujbae lo, dou song bouxlaux ndaem saekdi byaek ndaej, sou bouxcoz couh guenj sim’onj guh hong bonjfaenh couh ndaej lo!” Couh yienghneix, daxboh daxmeh ngoenznaengz cungj dwg nyaengq bae nyaengq dauq, cungj mbouj nyienh hoengq youq saekdi, dajleix gij byaek ndaw suen it bi seiqgeiq cungj miz gij byaek gwn mbouj liux, gosonq、gohing、mbaw lwgmaenz、byaekmbaengq daengj engq dwg baenz coij baenz coij heufwdfwd, gij gingjsaek yienghneix ngonzngonz ndawsim cungj gag angqvauvau.

Gou gag roxnyinh gou caen dwg doekseng youq diegndei, caemhcaiq miz daxboh daxmeh song bouxlaux neix ciuqgoq nyaenx lai ganqhoh nyaenx lai! Neix couhdwg bohmeh gou, geijlai gaenxguh、geijlai dwggingq! Daxboh daxmeh, nyienh sou song bouxlaux naih gyaeu naih souh, ndangdaej cangqmaengh!