Miz vunz gyaez ngoenz nditndat, hix miz vunz gyaez ngoenz fwn doek. Ngoenz ndit ndat neix, okrog fuengbienh, bae haw cawx doxyiengh roxnaeuz okrog bae youz cungj dwg ndei. Hoeng ngoenz fwn doek, gyoengq vunzlai yaek bae hwnjban roengzban、okrog bae gaicawx couh mbouj daiq fuengbienh geijlai lo. Caiqnaeuz dwg youq lajmbanj, ngoenz fwn doek couh youq ndawranz caeuq daxboh daxmeh、daeuq gyoengq beixnuengx gangjgoj roxnaeuz yawj densi, baenzngoenz mbouj yungh okdou.

Gou gyaez ngoenz fwn doek, aenvih ngoenz fwn doek gou couh ndaej cuengqsim daeuj guh gij saeh gou ngeix guh haenx. Banhngoenz neix, baih rog fwndoek, gou yawjraen naedfwn loenq, dingq ndaejnyi singfwn, couh lumj seizneix doxdoengz, baihrog fwn doek ningcaca, hoeng gou couh naengh youq aencongz bangxbien naj cueng, caemriri yawj saw. Dingq ndaejnyi aen sing fwn doek, ndawsim gou couh bienq ndaej soengswdswd, gij saeh fanzsim couh lumj ndaej fwn swiq bae nei, gij saeh sim mbouj onj haenx cungj gaen sing fwn lae bae mbouj dauq lo.

Gou gyaez ngoenz fwn doek, yienznaeuz ngoenz fwn doek hawj vunz okrog mbouj fuengbienh, hoeng gou nanznanz ndaej dingq aen sing naedfwn, hix dwg gienh saeh simhai haenx. Naed fwndoek roengz mbawfaex baihrog aen cueng, doek roengz mbawngaeuz ndaw dah dem, aen sing neix hawj vunz sim angqlele, couh lumj boux vunz ninz yaek ndaek seiz dingq ndaejnyi sing fwen cienz haeuj rwz doxdoengz, hawj vunz yaepyet couh bienq ndaej rengzfwdfwd hwnjdaeuj.

Gyanghaemh fwn doek seiz, seiqcawq caemriri, mizseiz cix dingq ndaejnyi duzgoep heuh geij sing. Sing fwn caeuq sing goep gap youq doengzdoih, couh lumj dwg miz boux vunz danz ginz ndeu, boux vunz guhfwen ndeu, hawj vunz mbouj rox seizlawz couh dingq fiz youq aen sing fwen ndawde lo.

Yawj ok aen cueng baihrog raen naedfwn doek, gou ngeix daengz gaxgonq baenz lwgyez lij iq ngoenz fwn doek seiz, moiz baez fwn doek gou caeuq geij boux hujgeiq ok ndaw fwn bae guhcaemz, caemz raemxfwn, caemz namh- boengz. Gyanghaemh dauq daengz ranz seiz, buhvaq cungj ndaekriri, gouh haiz nem rim namh, aennaj caeuq fajfwngz nem miz haujlai raemxfwn caeuq gij namhhenj lumj yanghhuz doxdoengz. Dahmeh gou miz baez raen gou dumzriri dauqranz, cungj dawz gou ndaq ciengz ndeu cij bae aeu geu buh seuq daeuj hawj gou vuenh daenj. Yienznaeuz moiz baez cungj deng ndaq, hoeng bungz daengz ngoenz fwn doek neix, gou lij dwg buet ok ndawfwn bae guhcaemz, caeuq gyoengq hujgeiq youq ndawfwn mwngz gyaep gou laeh simhai lele, engq gyaez naedfwn doek youq aennaj neix liengzcumcum.

Doeklaeng, ndawmbanj diuz roennamh- boengz gaij baenz roen suijniz, mboujlwnh dwg ngoenz fwn doek roxnaeuz ngoenz ndit ndat, caiq mbouj raen miz diuz roennamhboengz lo, hix yawj mbouj raen gyoengq lwgnyez gaxgonq youq ndawfwn doxgyaep doxlaeh riuriri lo. Seizneix, gou hix biek aen mbanj gou bae gyae guhhong, hix mbouj miz seizgan caiq youq ndawfwn bae caemz raemx lo. Hoeng moiz seiz fwn doek neix, gou ciengzciengz ngeix daengz lwgnyez hujgeiq ndawmbanj gou, ngeix naeuz caeuq gyoengqde youq ndawfwn guhcaemz, ngeix naeuz lij iq naedfwn doek youq aen ndang gou liengzfifi. Gaxgonq lij iq, naedfwn doek gwnzndang liengzfifi, roxnyinh soeng- swdswd; seizneix geq lo, fwn doek roengz gwnzndang daeuj hix dwg liengzcaucau, hoeng gij liengz neix mbouj caiq dwg soengswd lo, dwg nitriri youq ndawsim yienh okdaeuj.

Baez daengz fwn doek seiz, gou cungj ciengzciengz bomz youq bien cueng, yawj baihrog fwn doek ningcaca, raemxfwn swiq gij nyapnyaj gwnz diuzroen bae, swiq ndaej seuqsadsad, hix swiq bae aen sim naek gou, roxnyinh daengz, gij sing riu simlangh lwgnyez seizgonq bae caiq mbouj dauq.

Gou gyaez ngoenz fwn doek, fwn dingz gvaq seiz, rumz gap dawz gij rangva biu haeuj ndaeng daeuj, hawj vunz roxnyinh sim gvangq saenz langh.