Dieg Guengjsae Laizbinh Si Vujsanh Yangh Mbanjguj, miz boux daiqdaeuz baenz fouq he, de heuhguh Luz Baujlanz.

2000 nienz de duiyouh le, gvaq song bi couh ma daengz Mbanjguj. Seizhaenx Mbanjguj daengx mbanj cungj dwg ranznamh ranzngvax. Gyoengq vunzmbanj dingzlai dwg baengh dajndaem ciengx bak, mwh seizhoengq couh doxcomz youq guhdoj, boux guhdoj saw le mbouj miz ngaenz hawj, couh bae dajcaeg, engqlij daengj roen ciengjgiep dem, doeklaeng youh deng gaemh deng gyaeng. Mizmbangj bouxcoz gyaez gij ndwenngoenz ndawsingz, cungj buet coh haeuj hawsingz bae dajgoeng.

Luz Baujlanz raen gij cingzgvang neix, ndawsim gig naeknwt, de nyinhnaeuz: Daehhaeux aeu bongz, daehngaenz aeu haen, bonjfaenh aeu guh di maz gaijbienq gij yiengh vunzmbanj neix cij baenz. Ndigah de haidaeuz liujgaij hawciengz, fatyienh gai gij makit haemq ndaej gyaq. De boux daih’it daiqdaeuz douzcienz ndaem makit, bi daihngeih moux canj fanh maenz ngaenz. Gyoengq vunzmbanj rox le, cungj ra de, siengj riengz de ndaem makit. De mbouj aeu ngaenz son vunzmbanj baenzlawz ndaem makit, ndaem baenz le, de youh bang lienzhaeh lauxbanj daeuj sou makit. Baenzneix, Mbanjguj ndaem makit daj sam moux fazcanj daengz bak samcib roek moux. Daengz 2017 nienz, daengx mbanj ndaem makit gaenq daengz haj bak moux.

Vunzmbanj riengz Luz Baujlanz dajndaem gvaq, gaenq bouxboux canh ndaej ngaenz, ranzranz hwnj ranzlaeuz moqsaksak. Aenvih ndaem makit hong haemq lai, cengdi ngoenzngoenz aeu daengz ndaw suen bae ganq makit, gyoengq vunzmbanj hix mbouj ndaejhoengq bae guhdoj lo, cungj itsim niemh youq ndaw suen makit. Gij funghgi ndawmbanj hix ngoenz doek ngoenz bienq ndei bienq cingh. Dahsau gij mbanj henzgyawj hix nyienh haq daeuj Mbanjguj lo.

Vihliux haigvangq Mbanjguj canjnieb fazcanj, 2016 nienz Luz Baujlanz youh haidaeuz daiq gyoengq beixnuengx ndaem gobugvan, seizneix gaenq ndaem seiq bak moux lo.

Bouxcoz ndawmbanj haeuj singz dajgoeng haenx, doxbeij gij ndwenngoenz ndawsing caeuq mbanjranz, hix cungj ma ndawmbanj daeuj guh dajndaem lo.

Gyo’mbaiq miz Luz Baujlanz, daiq gyoengq vunzmbanj bienq fouq bienq miz. De seizseiz geiq maenh bonjfaenh dwg boux gungcanjdangjyenz ndeu, lij lix ngoenz ndeu couh lai vih beksingq guh di saeh.