Mwh yaek cuengqhag, doek fwn hung lo. Gou、Cuh Yijgez、Vangz Ginh doxcaez buet bae coh bakdou hagdangz, ndwn youq laj yiemhranz, caj vunz ndaw ranz daeuj ciep.

Daxboh Cuh Yijgez caeux couh hai ci gvaqdaeuj lo. Cuh Yijgez buet bae coh gyaqci ranz de, sugsed hai douci, riengjret ndonj haeuj ndaw ci bae. Fwn rwed mbouj daengz de lo. De hai cuengci, vadfwngz coh dou, riengz boh de hai ci baefwtfwt lo.

Daxboh Vangz Ginh hix hai aen cisamloek dienhdoengh daeuj ciep de. Daxboh Vangz Ginh cienq gyaeujci le, Vangz Ginh daiz ga hwnj ci, couh haeuj ndaw ci naengh ndei lo. Fwn hix rwed mbouj daengz de lo. De vadfwngz coh gou, hix caeuq daxboh de hai ci bae lo.

Gvaq haemq nanz seizgan, daxboh gou cij ganj daengz. De gang aen liengj byaij coh gou. Gou vaiqdangq byaij hwnjbae, lingzlaeux ndonj haeuj laj liengj daxboh bae. Fwn doek gig hung. Youq laj liengj daxboh, gou lumj duz roeg angqfaengz ndeu, mbouj dingz gangj gij saeh mizyinx ngoenzneix youq ndaw ban fatseng haenx.

Daxboh dwg byaij loh daeuj ciep gou, vanzlij gig ceiz. Hoeng gou mbouj ienq daxboh, hix mbouj ienq daxboh mbouj lumj daxboh Vangz Ginh yienghhaenx hai cisamloek dienhdoengh daeuj ciep gou, engq mbouj ienq daxboh mbouj lumj daxboh Cuh Yijgez yienghhaenx hai siujci daeuj ciep gou. Ranz gou mbouj miz siujci, hix mbouj miz cisamloek dienhdoengh, hoeng gou mbouj roxnyinh gou beij mbouj hwnj bouxwnq.

Geij bi gonq, gou ienq gvaq daxboh mbouj miz bonjsaeh, mbouj lumj ranz bouxwnq nei hawj gou gvaq gwndaenj fouqmiz. Doeklaeng, gou ciemh- ciemh majhung lo, rox daxboh doenghbi neix mbouj yungzheih. De buekmingh guhhong cij ndaej hawj gou gvaq gwndaenj ngoenzneix, gou gig rimhoz. Gou mboujdanh mbouj ienq de, lij gyo’mbaiq de ne.

Mwngz yawj, laj aen liengj daxboh, caeuq gyoengq doengzhag ityiengh, di ndeu hix mbouj deng fwn rwed daengz.

(Anhveih Swngj Suzcouh Si Laujhucuh Siujyoz roek nienzgaep Vangz Dungzyau)