Byaij youq gwnz loh iq lajmbanj, mwngz ndaej yawjraen haujlai gingj- saek gyaeundei.

Byaij youq gwnz loh iq lajmbanj, mwngz ndaej yawjraen baenz benq baenz benq byaekyouzcaiq. Youq laj ndit, va’byaekyouzcaiq henjrwgrwg. Reih byaekyouzcaiq fatok baenz raq baenz raq va hom, yinx daeuj haujlai duz rwi caeuq duz mbaj. Duz rwi gongzngw’ngw mbin bae mbin dauq, cingq nyaengq aeu faenjva ne! Doengh nazmeg heuyauyau yawj mbouj raen henz, giz mbouj gyae geij laeq lwgnyez byoq sauqmeg, singsauq mwngz dingz gou yiengj, geijlai angq ha, youq ndaw rumz iq ci go meg fubfeb hwnjroengz haenx, cienz bae gig gyae gig gyae……

Byaij youq gwnz loh iq lajmbanj, mwngz ndaej roxnyinh daengz liengzsisi, aenvih gizde miz faexcuk heusau soengz hwnj gwnzmbwn. Baenz go baenz go cuk sohsaeng haenx, lumj bouxcansw heusau, hwnzngoenz hen- souj aen mbanj. Gwnz dieg miz haujlai rangz oiqwt, ndonj aen gyaeuj okdaeuj, yawjyawj gizneix, ngonzngonz giz- haenx, lumj dwg baenzlawz hix yawj mbouj gaeuq. Youq gizneix, saek seiz lij ndaej yawjraen duz gaeqmeh daiq gyoengq gaeqlwg ndeu, youq ndaw ndoengcuk ra gwn. Roxnaeuz yawjraen duz gaeqboux ndeu ngiengxgyaeuj enjaek , rengzrwdrwd byaij bae byaij dauq, lumj angj gij gyaeundei de nei.

Byaij youq gwnz loh iq lajmbanj, mwngz ndaej dingqnyi sing raemx laecoco, haenx dwg daj diuz dah iq mbouj laeg hix mbouj feuh haenx cienz okdaeuj. Henz hamq, miz geij duz gvi gikgyan’gyan dak ndit; ndaw dah raemx sawndik yawjraen daej haenx, miz geij duz bya guh’angq; hamq dah doiqnaj, miz duz mahenj ndeu menhmenh gwn raemx, lij seiz mbouj seiz riz bak de, lumjdwg naeuz: “Gij raemx neix caen van ha!”

Byaij youq gwnz loh iq lajmbanj, mwngz ndaej mup daengz feihmak homfwdfwd. Haenx dwg daj suenmak seizcou cienz okdaeuj. Yawj, mak- bingzgoj naj nding’yanyan, lumj dah- sau launyaenq nei ndoj youq geh mbaw heu; makit gyaemq、makit heu mwngz caenx gou, gou caenx mwngz, cungj mbouj doxnyiengh, lumj baenz aen baenz aen caw nei gyaeundei raixcaix; maksigloux youq henz dinghdingh yawj dwk, mbe aen bak cungj dwg “heujnyawh” de, riu lo…… Ndaw doenghnaz, gohaeux henjrwdrwd cug lo, riengz rumz hwnjroengz diuqfoux. Souhgozgih youq ndaw naz buet bae buet dauq. Gwnz bo megmax yaengx bogfeiz nding’yanyan, angq- faengz ciengq go demsou. Gyoengq- vunz byaij youq laj ndithaemh, gwnz naj cungj dwg riunyumj angqyangz.

Danghnaeuz mwngz seizdoeng daeujdaengz gwnz loh iq lajmbanj, mwngz ndaej yawjraen lingh cungj gingjsaek. Seizdoeng lajmbanj, aen mbwn yienhndaej baenzhaenx sang, baenzhaenx seuq. Mbawfaex cungj loenq lo, gofaex ndoqndatndat ndwn youq ndaw rumz nit, nit ndaej saenzdedded. Gyoengq roeg iq ndeu cici caca hemq dwk, lumjdwg naeuz: “Seizdoeng daeuj lo, seizdoeng daeuj lo.” Geij mbawfaex henj youq ndaw ruz diuqfoux, gwnz loh iq bu hwnj caengz mbaw loenq nanwt ndeu, caij youq gwnzde, unqnemnem, lumj bu hwnj caengz deihdamj nei. Dangh- naeuz bungq hwnj doek nae, gingjsaek lajmbanj engq gyaeundei lo. Goengq- bya、doenghnaz、dingj ranz, cungj goemq hwnj caengz nae nanwtnwt ndeu, aen mbanj caemdingh de bienqbaenz aen biengz hausagsag ndeu. Goliux mbaw de loenq ndaej ndoqndatndat haenx, nga de venj hwnj diuz lienhngaenz yungzyeb ronghsag, gocoengz caeuq gobek daengx bi cungj dwg heusau haenx, cix venj hwnj giuznae mboengmbwt naekgywd. Raq rumz ndeu ci daeuj, ngafaex yaeng- yaeng bidoengh, diuz lienhngaenz caeuq giuznae gyaeundei haenx loenq roengzbyoegbyoeg, mbanae lumj mba- nyawh nei riengz rumz mbinfifi. Baenz gyoengq baenz bang lwgnyez youq ndaw diegnae doi vunznae, hoenx ciengqnae, gij singhemq angqyangz de, saenq ndaej nae gwnz faex cungj loenq roengzdaeuj lo.

Cingj mwngz daeuj gwnz loh iq lajmbanj byaijbyaij, youq gizde mwngz ndaej yawjraen doenghnaz demsou, ndaej dingqnyi raemx laecoco, ndaej mbup daengz feihmak homfwd, ndaej ngonzyawj daengz gingjsaek seiz- doeng gyaeundei.

(Swconh Swngj Yajanh Si Yujcwngz Gih Daihroek Siujyoz seiq (1) ban Liuz Yi)