Daeuhfouh faen miz daeuhfouhhau caeuq daeuhfouhyouz……

Seizneix gwnzhaw miz yiengh daeuhfouh he heuhguh “daeuhfouhhaeu”.

Gaiq daeuhfouhhaeu hung lumj aen habfeiz neix, goengfaen ndeu na, gaem youq gyangfwngz unqmommom, miz saekndaem caeuq saekhau song yiengh saek.

Gyanghaemh byaij hwnjhaw bae youz, gyaegyae couh miz gij heiq daegbied he biu haeuj ndaw ndaeng daeuj, haeufwdfwd. Gaen gij heiq neix byaij bae, youq baihnaj couh raen miz aen diemq ndeu, aen diemq bakdou baihgwnz raiz miz “daeuhfouhhaeu” sam cih saw hung, saw hung baihlaj sij “maenz ngaenz sam gaiq” seiq cih saw iq. Aen diemq daeuhfouhhaeu baihndaw mbouj suenq gvangq, aiq miz cib bingzfueng baedauq, miz song aen daiz cuengq gaenh ciengz. Haujlai vunz ndwn youq bakdou deq cawx daeuhfouhhaeu.

“Cungj daeuhfouh neix haeufwdfwd, baenz- lawz miz baenzlai vunz cawx gwn ni?” Ngeix daengz neix, gou couh byaij gvaqbae yawj, goeng lauxbanj he riuhaha caeuq gou gangj:“Dahnuengx, cawx daeuhfouhhaeu lwi, ndeigwn bw.”

“Mbouj cawx lo, haeu lai.” Gangj le gou couh riunyumnyum byaij deuz lo.

Miz ngoenz he, gou daiq daeglwg gou bae haw youz, cij mup dawz gij heiq daeuhfouhhaeu, gou gaem fwngz daeglwg couh yaek byaij deuz, daeglwg beng genbuh gou mbouj byaij, de naeuz:“Meh, baihnaj miz vunz gai daeuhfouhhaeu, raeuz bae cawx di he gwn ha?”

Gou doeksaet yat:“Yo, cungj heiq neix baenzlai haeu, mwngz gyaez gwn ha?”

“Mbouj haeu ha, mwngz mup raen haeu hoeng gwn haeuj bak couh mbouj haeu lo, gaxgonq daxboh cawx hawj gou gwn gvaq, gou raen ndeigwn dangqmaz ha.” Lwg gou naeuz.

Dingq de gangj yienghneix, gou couh daiq de byaij coh naj bae cawx lo.

“Lauxbanj, cawx cib maenz daeuhfouhhaeu he.” Daeglwg gou naeuz.

“Ndaej, caj di he.” Goeng lauxbanj gangj.

Goeng lauxbanj neix baez gaiq baez gaiq daeuhfouhhaeu geq roengz ndaw cauq cang youz bae caq, gij youz ndaw cauq dekcaca. Gou youq henz raen haeu lai, gyaeuj ngunhngangngang yaek bae mbouj dwg yaek dauq mbouj baenz. Yaep he, daeuhfouhhaeu caq baenz lo, de aeu aen habhau ndeu cang ndei cuengq roengz ndaw daehhau bae ndenq hawj gou, gou youq daehvaq mbon ok cib maenz ngaenz hawj lauxbanj le couh fung ndaeng bung bak daiq daeglwg dauqranz lo.

Daengz ranz le, daeglwg gou couh dawz hab daeuhfouhhaeu cuengq youq gwnzcongz hai okdaeuj, aeu gouhdawh ndeu nep gwn nep gwn, naj riunyumnyum lumj duj vafaiq angj hai nei. Raen gou mbouj gwn, lwg gou naeuz:“Meh, mwngz mbouj gwn ha, caen ndeigwn go, mwngz daeuj cimz yawj ne.”

Yawj lwg gou aj bak gyoepgyoep gwn ndaej diemzsubsub, gou couh gaem gouhdawh ndeu nep gaiq daeuhfouhhaeu he dwk haeuj bak daeuj.

“Dai lo, baenzlai haeu guhlawz ndwnj roengz dungx bae ha?” Gou ngeix. Hoeng aen feihdauh neix gingqyienz miz di…… Caengz dwk haeuj bak gij heiq haeufwdfwd, dwk haeuj bak le couh bienq ndaej homrwgrwg, caen ndeigwn dahraix ni. Raen neix, gou couh gaiq doek gaiq nep haeuj bak daeuj, yied gwn yied ndeigwn, dingz cungj dingz mbouj ndaej.

Youq ndawbiengz, miz haujlai saehndei couhdwg yienghneix, raeuz mbouj caengz rox de seiz cungj nyinhnaeuz de dwg saeh mbouj ndei. Youq gwnzbiengz, miz haujlai vunzndei hix dwg yienghneix, raeuz mbouj caengz caeuq de dox baedauq seiz couh nyinhnaeuz de dwg vunz rwix. Saeh miz it ngeih, yawj ndei cij gangj, vunz miz ndei rwix, raen gvaq cij rox.