70. Cam:

Duz maz nyaenx doeg sim,

Daiq cim dwk caekhaex?

Duz maz nyaenx rox ngeix,

Mbon faex daeuj caux diengz?

Hoiz:

Duzdoq saed doeg sim,

Daiq cim dwk caekhaex.

Duzbiux lai rox ngeix,

Mbon faex daeuj caux diengz.

71. Cam:

Cien fanh aen mboenj saeq,

Caez dwg cang lwgraz,

Go lawz rag sajnya,

Ndi raen daz daengz namh.

Hoiz:

Maknim ndaw miz ceh,

Naed geq lumj lwgraz,

Gosiengz rag sajnya,

Ndi raen daz daengz namh.

72. Cam:

Go lawz ndi raen va,

Aen baenzcaz gwnz ngeiq?

Go maz va hoengzmaeq,

Itseiq ndi ok aen?

Hoiz:

Gorungz ndi raen va,

Aen baenzcaz gwnz ngeiq.

Mauxdan va hoengzmaeq,

Ndei naeq ndi miz aen.

73. Cam:

Go neix go gijmaz,

Hai va cienz dauqdingq,

Go de hwnj seiq limq,

Va dauqdingq hausa.

Hoiz:

Ndawreih ndaem lwgraz,

Cienz hai va dauqdingq,

Makfiengz hwnj seiq limq,

Va dauqdingq hausa.

（10）