Daxmeh geq lo, mbouj miz maz ngah. Couhcinj seizneix dwg seizdaih bienqvaq riengjret, souhgih、densi、dennauj daengj yienghyiengh cungj miz, hoeng doengh gij yiengh doiq daxmeh daeuj gangj yunghcawq mbouj daih.

Seiz daxmeh lij iq, ndawranz gungzhoj, mbouj miz ngaenz bae hawj hagdangz, dingqnyi daxmeh gangj, seiz de lij iq, cij doeg baenz song haggeiz saw, couh mbouj ndaej doeg lo, ndigah, seizneix dahmeh rox gij cih saw haenx, gyonjgyoep daeuj cang mbouj rim aen loz ndeu. Gangjnaeuz yawj densi cezmuz, daxmeh cij rox yawj gij vunz ndaw densi daenj ya diuq ya, couh lumj vahsug naeuz “ma yawj raemx roengz” nei, gyoengqvunz ndaw densi gangj maz vah, de cix gawq vah ndeu hix mbouj rox. Yienghneix, ndawranz ngamq cawx ndaej densi ma, daxmeh angq ndaej mboengq ndeu, couh caiq hix mbouj ngah yawj densi lo.

Itdingh yaek gangj daxmeh miz maz ngah, goulau cij miz cungj ngah ndeu, cungj ngah neix itcig buenx daxmeh baenz ciuh vunz.

Youq lajmbanj Bouxcuengh raeuz, riuz ndaej caez gvangq caez nanz dwg ciengq beij eu fwen. Youq seizgonq, cengdi mbanjmbanj cungj miz canghbeij canghfwen, baez daengz gvaq ciet roxnaeuz guh laeuj cingj hek, cungj aeu cingj canghbeij canghfwen daeuj mbanj daeuj ranz eu fwen, baez daengz baij daiz eu fwen, daengx mbanj bouxlaux、bouxcoz、lwgnyez cungj comz daengz ranz haenx bae dingq, ndawranz vunz lai vunz daih, caenxnyaunyau, nauhnyied dangqmaz. Daxmeh ngah dingq beij dingq fwen goulau hix daj seizhaenx hainduj.

Hoeng, seizneix caeuq seizgonq mbouj doxdoengz lo. Seizneix youq dieg Bouxcuengh raeuz, gyaez ciengq beij eu fwen aen conzdungj neix gaenq ciemhciemh deng gyoengq hauxseng lumz bae lo. Gyoengq bouxlaux siengj dingq saek coenz beij roxnaeuz saek coenz fwen, beij siengj gwn saek donq noh lij hoj ha. Vihneix, daxmeh ciengzseiz youq baihnaj gou gangj, danghnaeuz miz aen gihgi lumj aen densi iq yienghhaenx, youh dingq ndaej vunz ciengq youq yawjraen dozsiengq, aeu daeuj langh fwen geijlai ndei ya!

Rox daxmeh miz cungj simnyienh neix, gou itcig geiqmaenh youq ndawsim. Daxmeh soqlaiz dwg boux vunz roxsoq, doiq gyoengqlwg dou itbuen mbouj miz maz iugouz sang, ndwenngoenz gvaq ndaej bae, couh gvaqbae lo. Seizneix daxmeh cingqging youq baihnaj gou gangj daengz saeh neix, gangjmingz de boux dog youq ndawranz mbwq lai, mboujnex, daxmeh mbouj gangj okdaeuj ne.

Ngamjhab gvaq caenh ndeu, gou okcai bae ndawsingz, seiz ndaejhoengq, gou couh bae ndaw denswj canghcangz gvaengz, yawjyawj dauqdaej miz mbouj miz cungj denswj canjbingj lumj dahmeh siengj aeu haenx. Gvaengz ndaej baenz buenq ngoenz, doeklaeng gou dauqdaej youq aen miz DVD denjswj gvihdaiz gizde ra daengz lo. Cungj denswj canjbinj neix, beij aen DVD gunghfanggih lai iq, couh miz bonj saw ndeu yienghhaenx hung, mingzcoh heuhguh “Luzfang Yingjgih”, mbouj bengz, song bak lai maenz ngaenz. Dingq bouxgai gaisau gij goengnaengz le, gou mbouj lawq saekdi, mbon cienz couh cawx roengzdaeuj. Gou rox, gou cawx ndaej aen doxgai neix, couh lumj cawx ndaej aen simnyied daxmeh. Mbouj rox dawz dauqbae hawj daxmeh, de yaek angq baenzlawz bae.

Okcai ma daengz ndaw yienh dou, gou youh leihyungh ngoenz singhgiz bae gwnzgai gvaengz, bae daengz bouqdiemq gai miz gvanghdez, cawx geij aen gvanghdez ciengq beij eu fwen. Yienghneix, cungjsuenq an max boiq caez lo.

Ndwencieng cuengqgyaj, gou caeuq yahlwg caez baema ranzmbanj, dou daiq miz aen Luzfang Yingjgih caeuq gvanghdez ganj dauqbae. Daengz ranz le, gou gangj daxmeh:“Daxmeh, bineix mbouj cawx buh moq haiz moq soengq mwngz lo, hoeng, gou soengq aen caencingz ndeu hawj mwngz, baujcinj beij soengq buh moq haiz moq hawj mwngz engq ndei, mwngz cai dwg maz?”

Daxmeh dingqnyi gou gangj le, han naeuz:“Miz maz dijbauj lai, gou cai mbouj okdaeuj bw!”

Gou naeuz:“Mwngz itdingh cai ndaej okdaeuj, mwngz siengjsiengj, mwngz ceiq siengj aeu maz?”

Daxmeh loq ngeixngeix, doeklaeng gangj naeuz:“Nanzdauh……Nanzdauh……Mwngz cawx ndaej……”

Gou han naeuz:“Dwg ha, gou caen bang mwngz cawx ndaej aen doxgaiq mwngz gaxgonq naeuz de lo, coh de heuhguh Luzfang Yingjgih, caemhcaiq cawx ndaej geij aen gvanghdez ciengq beij eu fwen dem ne.”

Gangj sat, gou daj ndawdaeh mbon ok aen Luzfang Yingjgih caeuq gvanghdez soengq hawj daxmeh. Daxmeh yaengx song fwngz daeuj coux, ndawbak nam gawq vah:“Lwg ha, mwngz caen miz sim ya, siengj mbouj daengz, gou gangj coenz vah mbouj miz sim ndeu, mwngz dauq geiq youq ndawsim baenznanz, caemhcaiq caen bae ra cawx dauq hawj gou!”

Gou han naeuz:“Meh ya meh, mwngz ciengx gou baenzneix hung, mwngz miz aen simnyied neix, bang mwngz saedyienh de, neix dwg wnggai, daj seizneix hwnj, mwngz youq ranz couh aeu neix daeuj gaijmbwq ba!”

Haemhde, gwn haeux sat le, gou son daxmeh baenzlawz yungh Luzfang Yingjgih, ndaw Luzfang Yingjgih yienh ok song doiq vunz dox eu fwen, cienz daeuj gij sing eu fwen rwenzrubrub seiz, gou yawjraen gwnz naj daxmeh riunyumnyum.