Bauqrengh singsing coux bi douq,

Gwndaenj mbouj you bouxboux angq,

Doengzcaez gyo’mbaiq gungcanjdangj,

Cukhoh ndangcangq cauh ngaenz lai.

Bi moq daeuj daengz bwh huq nyaengq,

Lwgyez cungj dwg angqvauvau,

Hwnj haw mbouj liz ngaeuz goau,

Hix mbouj luenh cauz caeuq luenh nauh.

Gij huq bwh caez aen sim vuen,

Nyezdoih gag dwen bae dwkcik,

Angq ndaej lumj gaeng gip ndaej sik,

Baez diuq sam dik riunyumnyum.

Nyaengq nem fouqdoiq venj daengloengz,

Nyez daeuj bangcoengh doengz raeuz nyaengq,

Gyoengqde daeuj coengh ndawsim haengj,

Giengz gvaq gag naengh caemz soujgih.

Caez raed vacueng dawz bae diep,

Daj iq cienzciep gij vwnzva,

Daj iq maijgyaez raeuz Cunghvaz,

Guek raeuz gij va dujduj lengj.

Gaj bit gaj gaeq gingq cojcoeng,

Caez baiq cojgoeng mbouj lumz coj,

Gyoengqde cimz doh gij haemzhoj,

Hawj raeuz lwglan rox mbaetgwn.

Haemhndaep daengx ranz comz gwn caeuz,

Lai dingq bouxlaux naeuz gij vah,

Cunghvaz vwnzva vunzlai ngah,

Daj iq okmax cienzciep ndei.

Hag rox ciep aeu gij cienz lok,

Bak van gangj ok gij vah ndei,

Laeb ndaej cingzeiq maenh youh raez,

Daj iq ciengzseiz rox hauqgingq.

Comzyouq soujhaemh cuengq bauqrengh,

Hauxseng nyezlaux engq angqyangz,

Lingzdiemj yaek daengz angq lumj gaeng,

Bauqrengh singsing daeng ndaej raeuj.

Co’it caeux guh ceizraemxrouh,

Cawj ndaej dawz daeuj baiq cojcoeng,

Mbouj lumz gij goeng raeuz cojgoeng,

Maqmuengh cojcoeng lai baujyouh.

Riengz meh bae daiq hag guhvunz,

Daih vunz ciep huq cunz baengzyoux,

Cingzngeih lohsoq lai ndaej raeuh,

Haujlai conzdungj caj raeuz cienz.

Fouxlungz haeuj mbanj haeuj gak ranz,

Cukhoh lwglan guh ndaej swnh,

Mbouj yungh youheiq gwn caeuq daenj,

Cauhgya bonjsaeh maenh youh hung.

Doengh gij hozdung ndei youh lai,

Heiqduenz hwnjdaiz daeuj biujyienj,

Dungxcaiz gyoengqde cungj caenh yienj,

Vwnzva gag saenq bienq ndaej giengz.

Doengh gij hozdung ndei youh lai,

Giuzsai baez hai gyoengqvunz maij,

Bekfwngz bang hemq mbouj rox naiq,

Sing haenq gvaqbae caiq fukdauq.

Ngoenz ciet laeujdaeng yaek daeuj daengz,

Gyoengqvunz cungj dwg faengz dahraix,

Gaj bit gaj gaeq dawz saenz baiq,

Caezcomz gyo’mbaiq cojgoeng raeuz.

Gij yieng gij lab dawz ndaej hoengh,

Gyaeuj mou nohyiengz gungq bouxsaenz,

Eufwen danqhaenh cwngfuj aen,

Baenzlawz hix gaen dangj raeuz byaij.

Laeuj ndei byaek ndei gungq cojgoeng,

Maqmuengh cojcoeng daeuj bangcoengh,

Lok hawj ranzranz caez hwnghoengh,

Bouxboux gvaq ndaej cungj vuenyungz.

Ngoenzde youh dwg Cietbauqlungz,

Yaek daengz banhaemh gyong laz yiengj,

Lungz daengz gyoengqvunz diemj bauqrengh,

Bauq caq ndang lungz engq angqyangz.

Angqyangz gvaq aen Cietbauqlungz,

Youq henz cungqvunz gouz hwnghoengh,

Ngoenz nyaengq guhhong nanz ndaejhoengq,

Ndaej daengz hwngvuengh bouxboux gyaez.

Ndwencieng cibngux suek haeuxfaengx,

Maqmuengh ndangcangq yienghyiengh baenz,

Guh saeh hab’eiq miz cingsaenz,

Gij daenj gij gwn mbouj youheiq.

Lumh daeng daj daeng youh yawj daeng,

Maqmuengh fuk daengz ciep mbouj duenh,

Angq ndaej najhai yienghsiengq vuenh,

Lwgnyez bouxboux uenj majhung.

Bouxcuengh conzdungj vwnzva lai,

Gyoengqraeuz wnggai bae ciepswnj,

Minzcuz vwnzva raeuz gagsaenq,

Bouxiq bouxoiq haenq ciep ndei.