Coumued, daxboh daxmeh daiq gou bae youzlozcangz guhcaemz. Gizde ceiq yinx vunz haenx couh dwg ci’gvaqbya fwt hwnj fwt roengz heux hwnj heux roengz haenx lo! Yawj diuz gveijdau ci’gvaqbya sangvidvid de, dingq boux naengh ci- gvaqbya swenjyauyau, gou hix siengj bae naengh, siengj ndeindei daejniemh cungj angqfaengz biufwtfwt haenx, hoeng youh miz di lau. Daxboh yawjok gij simsaeh gou, gaem fwngz gou naeuz: “Bae, bohlwg raeuz bae naengh ci’gvaqbya!”

Gou sikhaek angqfwdfwd, cawx fei le, couh diuqliklik buet haeuj aeu camhdaiz ci’gvaqbya bae. Baez hwnj camhdaiz, aen uk gou couh ndonj ok geij aen vwndiz: “Ci neix an mbouj ancienz ha? Youq byonghmbwn dwg mbouj dwg baenqhuhu ha? Hai ndaej vaiq mbouj vaiq ha?” Gou yied siengj yied gaenjcieng, ndawsim lumj miz cibhaj aen doengj- diuq caet hwnj bet roengz. Mwhde, bouxguenjleix daeuj lo, de youq gwnz hwet gou cug saiancienz gonq, youh youq baihnaj gou caeuq daxboh daep hwnj fwngzgaem ancienz. Yawj gij ancienz cosih neix, aen sim gou venj hwnj haenx dauqdaej cuengq roengzdaeuj di ndeu lo.

“Gaca gaca”, buenx dwk sing loekci yiengj, ci’gvaqbya menhmenh haidoengh lo. Ci bingzonj hai youq gwn “lohbya” ngutngut ngeungeu haenx, gou soeng gaemz heiq ndei, yawjdaeuj ci’gvaqbya mbouj miz maz ha! Sawqmwh, aen ci daih van it bak betcib doh, cungj rengz yawj mbouj raen ndeu dawz aen ndang gou fwt rag coh mbiengj vangungj haenx bae. “Deng mbouj deng fid okbae ha?” Gou ndawsim sawqmwh lau raixcaix, “mbouj deng lwi, miz saiancienz ne.” Gou mboujduenh gag nai swhgeij.

Gvaq yaep ndeu, goengq “gozbya” sangvid ndeu okyienh baihnaj gou, ci’gvaqbya yaek benz bya lo. Ci hai yied daeuj yied vaiq, sing “gaca gaca” naekgwd lumj cingq naeuz gij dwgrengz benz bya de. Ndang gou hix mbouj youz ndaej gou dak coh baihlaeng, sim gou diuqbubbub, aen da gag laep ndaej ndaetndi’ndi. Benz daengz dingjbya, ci sawqmwh dingz roengzdaeuj, gou swhyienz hai da ok, yawj coh baihlaj, va! Laeg mbouj raen daej, danghnaeuz vunz doek roengzbae haengjdingh ndok noh soiq yungz bw! Gou mbouj gamj caiq yawj, song fwngz gaem ndaet giz fwngzgaem, aenlaeng dep ndaet diegnaengh. Cingq youq mwh de, ci’gvaqbya yaengyaeng caem doxroengz, lumj duz maxndoi duet ek nei bag roengzbae, rumz lumj naq nei daj henz rwz biu gvaq, sim gou diuq daengz conghhoz lo.

Ci’gvaqbya ngamq rod daengz din bya youh sikhaek bongj hwnj gvaengzdiet luenz hung ndeu bae, gujgeiq miz cib geij mij sang bw! Dai lo! Dou couh yaek cienq gvaengz hung sam bak roek cib doh lo. Gou gig mbouj onj naemj dwk, miux laj gou roxnyinh aen ndang cungj deng venj hwnjdaeuj, mwh dungxmbouq ndangsaenz daeuj lo! Gou nyaenx mbouj ndaej swenjngaungau, song da laep ndaet, song fwngz gaem ndaet giz fwngzgaem, hoeng simndum gou di he hix mbouj noix. Gou roeproiq roxnyinh daengz aen ndang gou venj hwnj fuengyiengq mboujduenh bienqvaq, sien dwg cingq venj, gaenlaeng ngeng venj, youh bingz venj, caiq dauq venj, uk coh laj, lwed daengx ndang cungj nyoengx haeuj aen uk bae, gyaeujngunh ukhonz, cungj dauq venj neix caen hojsouh…… “Gaca” sing ndeu, ci’gvaqbya menhmenh dingz roengzdaeuj lo, gou hai da, daxmeh cingq ndwn youq baihrog baenghlanz riu coh gou ne.

Simndum mboujonj gou dauqdaej dingh roengzdaeuj lo, gou sup gaemz heiq ndeu, gej saiancienz ok, yaek byaij roengz ci. Mwhde cij fatyienh, ga gou unq ndaej byaij mbouj ndaej roen lo.

(Gyanghsuh Swngj Yangzcouh Si Yuzcaiz Sizyen Yozyau haj nienzgaep Giuh Cwngnen)