38. Yiengh de lumj gyu diengz,

Aeu bak siengz ndi ndaej,

Boux guh naz guh reih,

Miz de ndaej demsou.

(Vafeiz)

39. Cam:

Lajmbwn miz duz maz,

Lwgda youq najbyak?

Duz gijmaz lai ak,

Ndaw bak gamz diuzgaeu?

Hoiz:

Duzvaiz dem duzcwz,

Lwgda you najbyak.

Dwg duzmax haeb sieg,

Ndaw bak gamz diuzgaeu.

40. Cam:

Mwngz naeuz duz gijmaz,

Bae byaibya doek foed?

Duz gijmaz daeh moeg,

Bae ndoeng laep caux rongz.

Hoiz:

Duzruemh dem duza,

Bae byaibya doek foed.

Duznou dem duzhaet,

Bae ndoeng laep caux rongz.

41. Cam:

Mwngz naeuz duz gijmaz,

Bae byaibya gangj Hauq?

Youh duz maz doengz sauh,

Bae gwnz byauh gangj Gun?

Hoiz:

Duznyaen caez doxdaz,

Bae byaibya gangj Hauq.

Roeglaej dem ciumauh,

Bae gwnz byauh gangj Gun.

42. Cam:

Gwnz bya cien yiengh gaeu,

Gaeu maz mbouj miz byak?

Lajmbwn cien boux hak,

Hak maz mbouj ninz swiz?

Hoiz:

Gwnz bya cien yiengh gaeu,

Bwngyaeuj mbouj miz byak.

Lajmbwn cien boux hak,

Naezyou mbouj ninz swiz.

（4）