Seizgan gvaqbae vaiq lumj naq,

Gyoengqvunz coh naj yamq mbouj dingz,

Aendangj fueng’yiengq vix ndaej mingz,

Cingz dangj minz lumj bya caeuq raemx.

Dangj raeuz ciuhai Ngeihcib Daih,

Vih raeuz daihlaeng veh lamzdoz,

Daengx guek lwgminz riuhoho,

Diuqfoux ciengq go angq dahraix.

Doengh gij cingsaenz Ngeihcib Daih,

Cienz doh seiqgyaiq gyoengqvunz vuen,

Caezcaemh doxgap mbouj yungh dwen,

Gomak ndaw suen daeuj guh hoengh.

Guek wnq ceng daeuj caez hozcoz,

Lajmbanj bouxcoz bouxgeq angq,

Ndaej baengh Cunghgoz Gungcanjdangj,

Diuz roen siujgangh gvangq youh bingz.

Caez hoenx binghraq mbouj ceng goeng,

Daengx guek gaijfung caez buekguh,

Saenqhwng lajmbanj mbouj gangjboq,

Caezcaemh cauhmoq guek fukhwng.

2023 nienz daeuj daengz,

Gwnz ndoi duzgaeng duzduz angq,

Roegciu eu ndaej sim engq sangj,

Lumj gaeq ndaej langh ok aenloengz.

Gak cug beixnuengx comz doxangq,

Cungj danq aen dangj vih lwgminz,

Daihgya doxgiet caez yamqdin,

Bya haij daeuj lanz mbin bongh gvaq.

Vihliux saedyienh yendaiva,

Gyoengqraeuz daihgya caez haenqguh,

Mbouj lau baihnaj gij haemzhoj,

Dingh dawz guekcoj bienq fouqgiengz.

Byaij roen aen aek enjeng’eng,

Daengx guek roengzrengz bae cauhmoq,

Mbouj lau lae hanh mbouj gangjboq,

Dingh aeu guekcoj cienz fukhwng.

Haenqguh faexdiet hix hai va,

Duh raeuz guekgya dingh hwnghoengh,

Neix dwg gwnzmbwn daeuj bangcoengh,

Gyoengqraeuz beixnuengx miz saenqsim.

Mbwn lok hawj raeuz seizgei ndei,

Gyoengqvunz aeu meiz(miz) saenqsim guh,

Roengzsim doenghfwngz mbouj lau uq,

Bungz deng haemzhoj hix mbouj saenz.

Ngeihcib Daih dangj vix roenloh,

Cungj dwg cienzdoh ndaw lajbiengz,

Gujli daengx guek gij hauxseng,

Mbeifag roengzrengz bae cauhmoq.

Giyez haenqrengz bae fazcanj,

Gyoengqvunz danqhaenh yawj ndaej gyae,

Bouxboux doengzcaez ceng guh ndei,

Gaemhdawz seizgei youh cauhmoq.

Deihfueng mbeifag caez haenq roemx,

Mbouj lau raemx laeg caeuq ndoi sang,

Lwgnyez gag hai aen godangz,

Bouxlaux daeuj nyangz sim hix angq.

Nyez ndaej bangcoengh rox bauqdap,

Iu doih doxgap caez damqra,

Cikcaenh cihsiz riuhaha,

Biet gen biet ga vih guekcoj.

Bouxlaux miz ndat daeuj ciuqrongh,

Caenhsim bangcoengh gij lwglan,

Caezsim gaijgez gij gunnanz,

Doenghboux ndangcanz eiqceiq maenh.

Dangj raeuz bangcoengh mbouj cuengqsoeng,

Bouxcoz guhhong maqmuengh daih,

Roengzrengz cauh ngaenz mbouj doeknaiq,

Caensim gyo’mbaiq aen dangj raeuz.

Hawciengz youh caiq ndaej hwnghoengh,

Dajgai mbouj hoengq nyaengq dangqmaz,

  Hix miz boux daeuj guh damqcaz,

Guh baenz dauqma caez maeuzveh.

Ganbu mbeifag guh gij saeh,

Caensim saed’eiq ngeixloekloek,

Guh ndei bya heu raemx hix loeg,

Dawz gij saehcingz doek engq saed.

Canghyw ndi lau gij yungyiemj,

Ndek bae cabniemh haenqguh hong,

  Yw ndaej bouxbingh aen sim soeng,

Lai guh song bi cungj sim nyienh.

Gaenx hengzguh “song aen dapan”,

Guh vunz mbouj dam haenqrengz guh,

Caenhsim vih minz vih guekcoj,

Caiq lai haemzhoj hix mbouj lau.

Yamq haeuj 2023 nienz,

Aen dangj vih raeuz cien fanh daih,

Lwgminz lumj dwg bya roengz haij,

Caezcaemh angq ndaej byaij coh naj.