25. Bit meh biz,

Roengz raemx mbouj raen riz.

(Dumq faengx)

26. Mbaek naz hausak,

Boux raen boux gvak.

(Moj ngaiz)

27. Goeng laux hwet enj,

Gwnz ndang seiq gaiq benj.

(Biengzbeih)

28. Gvan boemzhoemj,

Yah dingjai,

Doek fwn ok ndit mbouj lau dai.

(Vax)

29. Cam:

Gijmaz youq gungxdah,

Fwnraq rwed mbouj dumz?

Duzmaz youq ndawdaemz,

Dajcaemx ndang mbouj mbaeq?

Hoiz:

Gomungz youq gungxdah,

Fwnraq rwed mbouj dumz.

Duzbit youq ndawdaemz,

Dajcaemx ndang mbouj mbaeq.

30. Lauxbaeuq daenj buh hau,

Ngutngeuj sang youh sang.

(Hoenz)

31. Diuzmieng iet bae gyae,

Diuzdah lae bae biengz.

(Loh)

32. Gwnz hix dat,

Laj hix dat,

Cunggyang miz duz byalat.

(Bak)

33. Bak lumj bak roegga,

Ga lumj ga duzgoep.

(Geuz)

34. Goek goz byai soh,

Miz hoh mbouj miz mbaw.

(Cungq)

35. Duzvaiz dai henzdaemz,

Boux daengz boux bae heh.

(Rinbaenz)

36. Yaetyaet gvaq henzreih,

Yeixyeix gvaq henznaz,

Gut gumq youh gut ga,

Lwgda youq gyanghwet.

(Faggeuz)

37. Beixnuengx caet bet boux,

Humx diuzsaeu caez naengh,

Buhvaq caez caemh daenj,

Sik le caenh faengya.

(Gyaeujsuenq)

（3）