Youq Bingzgoj Si Maxdaeuz Cin Daemzrenh Cunh miz aen mbanj ndeu heuhguh Angqbing. Vihmaz heuhguh aen coh neix ne?

Dingq bouxgeq Mbanjangqbingz naeuz, doenghbaez gizneix mbouj miz mbanj hix mbouj miz ranz. Miz ngoenz ndeu, miz daegcoz he daengz neix daeuj ciengx vaiz. Miz duz ma’ndangq ndeu riengz de daeuj. Sawqmwh, duz ma’ndangq neix youq henz gaiq rinbanj ndeu “vaep vaep” raeuq mbouj dingz. Daegcoz neix roxnyinh geizheih couh byaij gvaqbae yawj, cij raen miz boux vunz ndeu boemz youq gwnzrin, caih duzma baenzlawz raeuq, de ning hix mbouj ning. Daegcoz neix byaij gyawj baez yawj, doeksaet yat, boux vunz neix gaenq dai gyangj lo. De doq buet dauq ndawmbanj naeuz hawj gyoengq vunzmbanj.

Daegcoz daiq gyoengq vunzmbanj daeuj daengz neix, gyoengq vunz- mbanj saeqsim cimyawj boux dai neix, cij raen laeng hwet de raek miz fagmid iq ndeu; aen mauh de miz aen haj gak sing saekhoengz ndeu.

Gyoengq vunzmbanj naemj: Boux dai neix aiq dwg bouxbing ndeu, aiq dwg youq gizlawz caeuq vunzdig doxhoenx caeuq budui saetsanq lo, youq gwnz roen ra budui cingqngamj gvaq gizneix. Lauheiq de dungx iek youh hozhawq, raen aen angqrin miz raemx, couh aeu fwngz gop gwn raemx. Hoeng, doeklaeng couh dai bae lo.

Bouxcuengh mbanjrungh soqlaiz simsoh lauxsaed. Daihgya doengh fwngz, hawj boux dai neix roengz namh lo.

Gvaqlaeng, boux vunz mbanj- rungh ndeu dingqnyi gyoengqvunz baihrog gangj, aen mauh miz haj gak sing saekhoengz couhdwg bing hungz- ginh, caemhcaiq ndaej rox bing hungzginh dwg vih bouxgungz guh gwzming.

Boux vunz mbanjrungh neix rox- nyinh caezgya guh gienh saehndei ndeu. Dauqranz le couh ciu vunzlai doxyaeng, youq henz moh bouxbing hungzginh neix hwnj aen ranzmiuh ndeu. Caemhcaiq hawj doiq lwggyax beixnuengx singq Maj ndeu daeuj guenj aen miuh neix.

Doiq lwggyax beixnuengx neix baenzngoenz youq ndaw miuh hwnj- yieng、baet sauq, gvej gij rum haz seiqhenz ranzmiuh bae.

Aenvih ranz gyoengqde liz ranz- miuh gyae, moix ngoenz song beix- nuengx neix sai haujlai seizgan youq gwnz roen baedauq.

Gvaqlaeng, beixnuengx neix hixnaengz daengz aen dieg liz ranz- miuh mbouj gyae he dap aen bungz ndeu, moix ngoenz guh gij hong ndawmiuh sat lo, couh youq diegfwz seiqhenz hai reih ndaem doenghgo.

Beixnuengx neix baet aen ranz- miuh seuqfitfit, daengz cai daengz ciet vunzmbanj seiqhenz daeuj hwnjyieng cungj rimhoz raixcaix. Ngamq bi ndeu, aen dieg neix couh gve mak rang mbin, bit gaeq baenz bang lo. Beixnuengx neix gaenx guhhong youq seiqhenz cungj cienz doh lo, haujlai dahsau cungj naemj haq hawj songde guh yah.

Beixnuengx neix fatcaiz lo, couh youq henz bungz hwnj aen ranz hung ndeu. Guh ranz caenh de, vunzmbanj seiqhenz cungj gag daeuj bang hong, ndawde miz haujlai dahsau, gyoengqde bang hong caemh- caiq daeuj yawjyawj beixnuengx neix baenzlawz yiengh. Songde hix dajsuenq ranz hwnj baenz le couh aeuyah.

Mbouj geijlai nanz, ranz moq hwnj baenz lo. Haeuj ranz moq ngoenzde, hix dwg ngoenz beixnuengx neix caeuq song dahsau doxaeu. Vunzmbanj seiqhenz cungj daeuj goenghoh, nauhyied dangqmaz, boux- boux naj maez riu angq, vah ndei mbouj daengx.

Bouxgeq naeuz “cijaeu bouxvunz gaenx, gag youq gag miz nyeq(noh), gag geq gag miz yah”, gij vah neix caen mbouj dwg gyaj, songde couhdwg yienghneix.

Gyoengq vunzmbanj nyinhnaeuz, beixnuengx neix daj gungzhoj bienq miz, gizneix daj diegfwz bienq nauh- yied, hawj gyoengqvunz sim’angq, cungj dwg bouxbing neix baujyouh, ndigah, gyoengq vunzmbanj couh heuh aen dieg neix guh dieg “Angqbing” lo.

“Angq”, youq Vahcuengh bonj- dieg neix miz song aen eiqsei, aen ndeu couhdwg aen gumz rin miz raemx neix; lingh aen ndeu couhdwg sim- angq.

Gyoengqvunz rox aen dieg neix ndei, boux dem boux ranz doek ranz senj daengz gizneix daeuj youq, vunzlai couh bienq baenz mbanj, aen coh mbanj couh heuhguh Angqbing.

Seizneix byaij haeuj seizdaih moq lo, Mbanjangqbing ranzranz hwnj ranzlaeuz, gij luengq cungj dwg roensuijniz, gizgiz seuqcingh. Vih geiqniemh bouxbing hungzginh neix, Daengz cai daengz ciet ranzranz cungj bae miuh baiq de dem.