Youq ndaw ndoengfaex gyaeundei, youq gyoengq doenghduz iq dwggyaez ndeu. Daihgya cungj gyaez seuqcengh, soqlaiz mbouj luenh vut nyapnyaj, cawzle duz mou gudgud.

Miz ngoenz ndeu, duz mou gudgud bae baihrog guhcaemz, mwh dauqma cawx aen haeuxyangz ndeu itmienh gwn itmienh byaij, mwh yaek daengz ranz cingqngamj gwn liux, cij lw linxyangz lo. De siengj: “Fanjcingq ranz gou hix mbouj miz doengjnyapnyaj, couh vut bakdou ndaej lo!” De Swnh fwngz couh vut linxyangz youq bakdou, haeuj ranz bae lo.

Gvaq yaep ndeu, duz lingz iq ndeu fwngz gaem naenggyoij seiqlengq ra doengjnyapnyaj. Sawqmwh, de yawjraen giz dieg duz mou gudgud vut linxyangz haenx, ndawsim siengj:“Bouxwnq ndaej vut youq gizneix, mboujmiz gou hix vut youq gizneix ba.” Gaendwk couh dawz naenggyoij vut youq bakdou ranz duz mou gudgud.

Mbouj gvaq geij nanz, duz douqlwg ndeu daj ndaw ranz riuj daeh nyapnyaj ndeu okdaeuj. Yawjraen nyapnyaj bakdou ranz duz mou gudgud, gag gangj gag naeuz: “Yi, gizneix seizlawz guh aen camh- nyapnyaj moq ndeu loni? Beij aen camh- nyapnyaj gaeuq gyawj lai lo, hoeng mbouj laeb miz gaiqbaiz, doenghduz wnq haengjdingh lij caengz rox, gou daeuj laeb gaiq baiz ndeu ba!” Yienghneix, lwgdouq couh ma ranz guh gaiq baiz ndeu, laeb youq bakdou ranz duz mou gudgud.

Diemj cung ndeu, song diemj cung…… Seizgan ngoenz ndeu gvaqbae lo, bakdou ranz duz mou gudgud doi rim nyapnyaj. Haet daihngeih, duz mou gudgud hai douranz, yawjraen nyapnyaj doi lumj bya iq, hujdengdeng diuq hwnjdaeuj. Mwh de yawjraen gaiq baiz “camhnyapnyaj”, cij fwt rox lo: A! Laxlawz dwg swhgeij mbouj gyaez seuqcengh、luenh vut nyapnyaj nyex hux daeuj ha!

Daj mwhde hwnj, duz mou gudgud caiq hix mbouj luenh vut nyapnyaj lo.

(Sanhdungh Swngj Caujcangh Si Cunghgih Gensez Lu Siujyoz ngeih nienzgaep Du Li)