Youq ndaw daswyenz, duz moed dwg geijlai iqet ha, hoeng youq baez dingjlingz cazyawj ndeu, gou gaijbienq cungj yawjfap neix lo. Gyoengq moed iqet neix, ndaej hawj gou cungj daezsingj ndeu.

Ndit raeujrub dak gwnz yangzdaiz, gou sij sat cozyez le, boemz youq gwnz yangzdaiz yawj funghgingj, nyeuq doxgaiq ndaemndwtndwt ndeu yinxhwnj gou haeujsim. O! Laxlawz dwg gyoengq moed ndeu, mbouj deng, ranz gou baelawz miz moed ne? Gou yawj coh giz duz moed raih daeuj haenx, sawqmwh rox lo, doenghgij “diemjndaem iq” neix youq geh ciengz baihrog ranz gou, seizneix cingq doz gijgwn——duz non hau ndeu ma ranz ne! Cij raen gyoengqde yamq yamqdin cingjcaez, byaij coh rongzmoed. Dan baengh geij duz moed neix baenzlawz buen ndaej duz non “hung” neix ma ndaw rongz ne? Gou gig geizheih, siengj yawjyawj gyoengq moed baenzlawz guh, couh hainduj cazyawj gyoengqde.

Cingq youq mwhde, aen mbwn couh lumj aen naj lwgnyez nei——gangj bienq couh bienq, fwn doekhumhum roengzdaeuj. Fwn baenz hung, gyoengq moed itdingh deng fwn rwed boedbaih luba! Mbouj liuh daengz, gou iet gyaeuj ok yangzdaiz yawj, cix raen gyoengq moed yienznaeuz mbouj lw geij duz lo, hoeng lij ciuqyiengh gengget giet baen nyeuq giuzndaem iq ndeu, ndaetndet bamq youq ndaw geh ciengz, humx dawz duz non mbouj cuengq! Gou gig doeksaet, hoeng youh siengj, couhsuenq duz moed roengzrengz dingj youq, hoeng fwn hung neix mbouj rox seizlawz cij dingz ne, gyoengq moed haengjdingh mbouj dingj daengz fwn dingz. Gou hojsik bibi gyaeuj, ma ndaw rug yawjsaw lo.

Fwn hung doeksasa haemq nanz le, menhmenh bienq iq lo, gou byaij ok yangzdaiz bae, mbouj miz maz maqmuengh iet gyaeuj okbae, dahraix, gyoengq moed mbouj raen lo. Cingq youq mwh gou saetmuengh yaek byaij bae, duz non doenghyedyed ndeu yinxhwnj gou haeujsim, neix mbouj dwg “gijgwn” gyoengq moed ha? Baenzlawz dauq lix lone? Gou geizheih yawj coh baihlaj, gingqyienz dwg geij duz moed ndaw fwn hung lw roengzdaeuj haenx cingq doz duz non menhmenh daenqdoengh, vanzlij miz haujlai moed daj dieg wnq raih daeuj doxcoih dem, gou sawqmwh anj lo! Duz moed iqet baenzlawz miz rengznyangq baenzneix hung? Cungj cingsaenz gaemgaenj mbouj cuengqsoeng neix sawj gou najmong lo. Siengjsiengj baezgonq gaujsi gauj mbouj ndei le, gou couh doeknaiq liux, mbouj miz saenqsim, ngoenznaengz hwnjdangz、sij cozyez cungj dwg lujluj lajlaj, gou fwt najnding lo. Rumz fwn ci rwed mbouj dwglau, cijaeu gou lumj duz moed nei gamj najdoiq dwgrengz, dingj rumz baenaj, baenzbaenz cungj mbouj lau, doeklaeng couh itdingh ndaej hingz!

Siengj daengz gijneix, gou ganjgip ma ndaw rug, ra ok bonjlienhguh vut bae haemq nanz haenx, nyinhcaen lienh hwnjdaeuj.

(Fuzgen Swngj Cenzcouh Si Anhhih Itsiuj seiq nienzgaep Liu Yihyungz）