“Baenzneix baenzlawz suenq?” Daiq youq henz dourug yousim nam, yenzlaiz de caeuq daxmeh hix cingq youq nyi Aulungzgveiz gangj vah ne.

“Deuz mbouj ndaej lo, hwng, gou cungjsuenq ndaej boizhaemz lo……”

Aulungzgveiz haenq laepda, gig gvai hawj bohgoux bang de dwk yw.

“Mwngz hix doeg lai lo, Lungz Byauh!” Daiq youq ndawrug gangj.

“Hei, mbouj yienghneix doiqfouq gyoengqde, Mbanjgyaeujdah mbouj rox ngoenz lawz youh deng ciengjgiep lo! Gij saeh cibgeij bi gaxgonq youh yaek dauq deng baez he lo—— Ai!”

“Ndei lo, gaej gangj vah lo.” Bohgoux dauqlaeng daengq gou,“bae sousib sahfaz raez, hawj Aulungzgveiz ninz.”

Gou han sing ndeu, ndawsim vuenheij dangqmaz, aenvih gij yienghndei Aulungzgveiz youq ndaw- sim gou fukdauq lo, hawj gou baiqfug caeuq aeueiq.

Ngoenz lij caengz rongh, bohgoux couh fatdoengh gyoengq vunz mbanj saeujgaemh 4 ndaek caeggeq deng ngwzdoeg haeb, youq ndaw ndoeng- faexnganx henz miuhsaenzvangz ra ndaej gyoengqde dahraix, dingqgangj gyoengqde cungj doeng laemx sae mbit ninz youq gwnznamh, gaenq deng doeg mauh lo, bohgoux sik- haek heuh vunz aeu dan’gyaq ram gyoengqde haeuj ndawsingz bae.

Gou daj bakmbanj ndaejnyi aen siusik neix, doq buet dauqbae lwnh hawj Aulungzgveiz.

“Mbouj dai hix aeu hawj gyoengqde deng gyaeng cibgeij bi!” Aulungzgveiz riunyumnyum naeuz:“Hei! Gou liuh gyoengqde lix mbouj ndaej lo, geijcib duz ngwzcaetyamq dungx iek le haujlai ngoenz lo!”

“Aulungzgveiz.” Gou beij de lij angq,“baezneix mwngz ndaej ndei lo, ndaej boizhaemz lo, gij mingzdaeuz haeu mwngz ndaej swiq cingh lo, daengzcog mwngz ndaej youq ndaw- mbanj najhai najrongh lo!”

“Ai——” Liuh mbouj daengz de danq le gaemz heiq ndeu. “Caj gou baksieng ndei lo, aeu gaemh doenghgij ngwzdoeg cuengq okbae doxdauq gonq, doeklaeng, gou couh ndaej bae Yanghgangj lo.”

“Vihmaz? Seizneix vunzmbanj cungj maij mwngz lo?”

“Mwngz mbouj rox! Mbouj- gvaq——” De caem le yaep he, sing daemq gangj,“cijaeu vunzmbanj mbouj caiq youq baihlaeng ndaq gou, caemhcaiq mwngz hix saenq gij goj haemhhaenx gou lwnh hawj mwngz couh baenz lo.”

“Gou saenq, gou itcig saenq!” Gou sing hung han de.

(sat)