Danghnaeuz mwngz cam gou, suenangq gou youq gizlawz, gou itdingh naeuz: “Suenangq gou couh dwg ranz- mbanj gou!”

Seizcin, ndaw dah lae dingdung lumj baenz aen baenz aen yaemfouz cingq- caih diuqdoengh. Dahsau seizcin lumh aen gyaeuj gou, heuh gou naengh roengzdaeuj dingq singgo diuzdah iq; dahsau seizcin lumh dwk daihdeih caeuq gofaex, bang gyoengqde daenj mauh heuoiq. De lij daiq daeuj haujlai baengz- youx: Roegenq、mbungqmbaj、duzdouq caeuq roeggacak daengj, dou youq ndaw ndit daxgoeng daengngoenz dak- ndit raeujrub.

Seizhah, duzbid youq gwnz faex angqyangz ciengq dwk go, faexhung youq henz bekfwngz goksasa. Mbouj rox mbouj nyinh, daihdeih bu hwnj caengz deihdamj saekheu ndeu, lumj cingq angqcoux daeggo seizhah daeujdaengz nei. Daeggo seizhah vihliux hawj dou gej hozhawq, caenfwngz ndaem le haujlai gvehoengz, mbouj geij nanz, gvehoengz ndaej gwn lo, gvehoengz aenaen hung lumj aen cuzgiuz nei. Daeggo seizhah dawz doenghgij gvehoengz neix soengq hawj daihgya. Daihgya gwn gvehoengz mbouj dingz haenh daeggo seizhah, daeggo seizhah ndawsim angqvauvau.

Seizcou, mehsimj seizcou bang gofaex rieg hwnj buhhenj, daihdeih youh bu hwnj caengz deihdamj saekhenj he, angqcoux daxgoeng seizdoeng daeuj- daengz. Doengzseiz mehsimj seizcou lij daiq daeuj haujlai laex, lwgndae、makcauj、makgam、haeux…… Gou ceiq maij daj gwnz “deihdamj” gip aeu mbawfaex ceiq nding daeuj ngoenzyawj. Neix caen dwg mbaw doz gingjsaek gyaeundei he ha!

Seizdoeng, daxgoeng seizdoeng hozswnh cungj hawj diegnywj、doenghnaz、gofaex hoemq hwnj caengz denznae nanwt he. Mwhde dwg aen geiqciet dou ceiq maij ndeu lo, dou mbouj goq rumznae bae dieg nae guhcaemz. Miz mbangj doi vunznae, miz mbangj hoenxciengq nae, lij miz mbangj ringx giuznae. Daihgya guhcaemz ndaej angq raixcaix.

Ranzmbanj gou, mboujlwnh geiqciet lawz, cungj dwg hawj gou siengjgyaez. Gou gyaez suenangq neix.

(haj nienzgaep Hanz Yinlinz)