Daj gou geiq ndaej saeh hwnj, yahdaiq cungj dwg nyaengq mbouj dingz, saeg buh、cawj haeux、baet ranz…… Mbouj dingz saek yaep. Aen ranz cungj deng de sousib ndaej cingjcingj caezcaez.

Hoeng yahdaiq mboengqneix miz di geizgvaiq, cungj dwg haetcaeux ok dou, banhaemh cij dauqma, mwh ma daengz ranz cungj dwg hanh lae hanh roenx. Daxmeh ngeizvaeg cam de: “Meh, mwngz geij ngoenz neix bae gizlawz ha? Baenzlawz dauqma baenz haemh?” Yahdaiq saeknaj haunyo, saenzcingz gaenjcieng, gangj vah hix suksuk siemjsiemj: “Mbouj…… mbouj bae gizlawz ne! Couh…… couh youq laj laeuz byaijbyaij. Ae, mbouj miz yungh lo, lai byaij geij gien couh baeg baenz yienghneix.” Daxmeh hix mbouj caiq lai cam, hoeng lij dwg buenq saenq buenq ngeiz.

Miz ngoenz ndeu, yahdaiq dauqdaej deng dou yawjraen lo. Ngoenzde, gou dwgliengz lo, daxmeh daiq gou bae segih weiswnghsoj yawj bingh. Ngamq haeuj dou, gou couh yawjraen boux vunz gou sug he——byoem raizhau, daenj buhguhhong caez- cingj, daemqdaemq bizbiz, de mbouj couh dwg yahdaiq gou ha. Cij raen de gungj ndang roengz, sugsed baet dieg, seiz mbouj seiz aeu fwngz uet hanh gwnz naj.

Gou yawj coh daxmeh, ragrag genbuh de, vix coh yahdaiq naeuz: “Meh, de mbouj dwg……” Daxmeh danq gaemz heiq ndeu, bibi gyaeuj, cix gijmaz cungj mbouj gangj.

Ma daengz ranz le, yahdaiq lumj lwgnyez guh loek saeh nei, ngaem gyaeuj roengz. Daxmeh nyaeuqnyaeuq bwnda, haemqnanz cij hai bak: “Meh, mwngz neix gaenq mbouj dwg baez daih’it lo. Baez gonq mwngz laeglemx ra faenh hong ndeu, deng gou swz lo, mwngz baenzlawz youh ra faenh hong moq ne? Mwngz youq ranz ndeindei yietnaiq, dou youq baihrog ndeindei guhhong, mbouj ceng faenh hongcienz mwngz neix. Mwngz seizneix ndangdaej lij cangq, ngoenz lawz saeklaeuq ndang- daej mbouj ndei lo, di cienzhong neix cungj mbouj gaeuq yw bingh mwngz!”“Ai, gou yawj sou ngoenz- naengz guhhong baenzneix sinhoj, gou boux geq neix hix bang mbouj ndaej gijmaz, couh siengj bang sou faendan di ……”“Meh, gou rox mwngz saedceij hoj gvaq gvenq lo, geq le hix dingz mbouj youq. Danghnaeuz mwngz caensim sim’in dou, couh swz faenh hong neix bae ba……”

Lwgnyez lumjbaenz mboujlwnh maj geijlai hung, youq ndaw da bohmeh cungj dwg lwgnyez maj caengz hung, dwg cuengq mbouj roengz gij gvaqniemh bohmeh. Yahdaiq nyinhnaeuz guh hongranz dwg gij cwzyin de, okbae guhhong ndaej gemjmbaeu rapdawz daxmeh, gangj daengzdaej, cungj dwg aenvih gyaez dou.

(Gyanghsuh Swngj Suhcouh Si Suhcouh Gunghyezyenz Daihngeih Sizyen Siujyoz roek nienzgaep Se Swjsinh)