“Mwngz aeu cehgocoengh caeuq golae cienq hawj Ahveij gwn, yienghneix mbouj dwg daegdaengq aeu mingh Mehveij song mehlwg ha?”

“Ahbyauh!” Aulungzgveiz hemq ndaej gou baihlaeng caep baez he:“Mwngz baenzlawz guh ne? Cienq gij yw naengj fwngz hawj Ahveij gwn? Gou mbouj dwg gangj ndaej gig cingcuj ha?!”

Gou itseiz deng maenj ndaej gyaeuj ngunh da raiz, nam dap:“Gou lwnh gij vah mwngz hawj Mehveij gvaq lo.”

“Ha!” Bohgoux baenq gyaeuj dacaengz gou baez he:“Itdingh dwg gauj loek lo, Ahveij yiemjyiemj dai bae!”

“Seizneix ne?”

“Ndei lo. Caeklaiq gwn gij yw gaijdoeg ndaej gip.”

“Ai!” Aulungzgveiz youh danq gaemz heiq ndeu:“Baenzneix Mehveij itdingh haemz dai gou lo! Neix……ai……”

Bohgoux biengj hai saekbingz, aeu lwgfwngz danzdanz ndangbingz, dwk ywmba ndaw bingz youq gij baksieng Aulungzgveiz.

“Ngoenzde aenvih Ahveij deng ngwzdoeg haeb, gou daegdaengq hwnj bya bae caiq ra di ywdoj, liuh mbouj daengz bungz ‘Vangzvaizgvaiq’, caeklaiq gou rox di vahyaem gyoengqde, gyoengqde couh daiq gou haeuj ndaw bya bae lo…… Ai!”

Bohgoux laebdaeb bang de swiq gij baksieng gwnz mbaq.

Mwhneix, ndawsim gou lumj deng duzngwz haeb nei, yenzlaiz loengloek cungj aenvih gou! Dauq- ngeix ngoenzde Aulungzgveiz hawj gou song bau ywdoj, mingzmingz daengq ndaej cingcing cujcuj, miz bau he dwg gij yw naengj fwngz, cienq gij yw neix le aeu raemxfwi oemq giz deng ngwzdoeg haeb; lingh bau he gij yw aeu cienq gwn, doeklaeng gou ndenq song bau ywdoj hawj Simjmehveij, gangj caez lo, baenzlawz rox gauj loek ne?

“…… Ngoenzlwenz gyoengqde yaek roengz bya, gou couh yaeuh gyoengqde daengz ndawmbanj, hawj gyoengqde daengz ndaw ranz gou bae ndoj gonq, gou baez gven dou, couh mbehai loengz ciengx ngwzdoeg……”

“Aiya!” Gou caeuq bohgoux doengzseiz heuh ok sing.

“Duz ngwzdoeg cij haeb boux- vunz luenh swenj luenh buet, gou diuq hwnj gwnz daiz maeuq mbouj ning, seiq ndaek caeggeq haenx rox deng yaeuh lo, ‘Vangzvaizgvaiq’ yaengx fagcax daeuj camx gou, ndawde iqet, ndoj mbouj ndaej……”

“Seizneix gyoengqde ne?” Boh- goux gaenj cam.

“Aiq lij youq miuhsaenzvangz seiqhenz, byaij mbouj ndaej gyae hane……”

(caengz sat)