Dangj hai Ngeihcib Daih,

Simhai doengz vamoq,

Bae haw daengz daihloh,

Nuengx iu go eu fwen.

Siengj eu gijmaz fwen,

Cingj nuengx sien daiqloh,

Bya youz ndaw raemx moq,

Nyauh couh rox riengz laeng.

Dangj hai Ngeihcib Daih,

Bak va hai angqhoh.

Bya diuq roeg ciengq go,

Va gwnz bo haihoengh.

Ngeihcib Daih cingsaenz,

Doengz roengz fwn samnyied,

Gvancez lumj fwn rwed,

Faexdiet hix hai va.

Cungjsuhgi haedsim,

Lajmbwn vunz yunghhu,

Byaij daegsaek daihloh,

Guekcoj miz bya ing.

Cungjsuhgi baugau,

Doengz byaj bauq haicin,

Gawqgawq ndaej minzsim,

Sawsaw dingh daengzcog.

Muzbyauh dingh ndaej ndei,

Guekminz meiz(miz) maqmuengh,

Yendaiva guekgiengz,

Doengz bouxsien suenva.

Bi ngeih lingz samhaj,

Yendaiva daeuj daengz,

Dangj dazloh rongh daeng,

Itdingh raen gizgyae.

Ngeih lingz haj lingz nienz,

Caux ok giengz guekcoj,

Dangj minz caez buekguh,

Hai loh doq giuzgim.

Cibbet Daih gvaqdaeuj,

Cungguek raeuz vuenh mbwn,

Bouxhoj cungj miz gwn,

Duetgungz bongh siujgangh.

Ngamq gvaqdaeuj cib nienz,

Guek raeuz bienq daiq ndei,

Lumjbaenz naengh feihgeih(feihgih),

Seizseiz bae doxhwnj.

Gyoengq dou youq gwnzbiengz,

Gij yienghnaj ndaej vuenh,

Gag minzcuz beixnuengx,

Doxgiet ndongj gvaq gang.

Raeuz guek giengz daegsaek,

Gaenq caep baenz ciengzgiek,

Caez laebdaeb bae buek,

Laeuz lumj diet lumj gang.

Dangjcunghyangh haedsim,

Dwg gwnzmbwn daengngoenz,

Dazyinx raeuz lwgminz,

Cauh mbwn guh haij moq.

Cunghyangh gyoengq lingjdauj,

Bouxboux caux ndaej moq,

Byaij daegsaek dauhloh,

Guek raeuz rox hoenghhwd.

Daegsaek geizhoengz moq,

Hawj guekcoj dazloh,

Daegsaek swhsiengj moq,

Hawj daihloh rongh daeng.

Daegsaek cungguekloh,

Doeng bae doh ngaenzmboq,

Dangj daiqdaeuz hai loh,

Cienz minz doq giuzgim.

Daegsaek swhsiengj moq,

Daegsaek loh ciuq rongh,

Gohgi raeuz baenzdong,

Ndaej hwnj mbwn roengz haij.

Ngeihcib Daih hai gvaq,

Caezgya caen guh ndei,

Dangj hawj minz gyaq lae,

Raeuz bin bae gwnzmbwn.

Caen guh daengz ndawreih,

Daihdeih gyaij duzlungz,

Caen guh youq gwnzmbwn,

Mbwn doek fwn rwed haeux.

Cienz dangj caeuq lwgminz,

Caez doengzsim gvaq haij,

Bet sien youz feizhaij,

Bouxboux sai goengrengz.

Minz riengz dangj aen sim,

Gyaq giuzrin gvaq haij,

Ciengxlwenx riengz dangj byaij,

Fanh daih mbouj baenq gyaeuj.

Raeuz riengz dangj hwnj mbwn,

Caux fwn dingj hancai,

Raeuz riengz dangj roengz haij,

Vuenh haij ciengx lungzgim.