“Ahbyauh, mwngz daeuj dawz daiq.” Bohgoux doq rex daiq naengh youq aen eijgvaengx wnq doq daengq gou.

“W!” Gou doq han.

Aulungzgveiz vang baengh youq gwnz eijgvaengx, gyaeuj loq boep, diemheiq gig gaenj, bohgoux cuengq aen daengyouzhaeu youq henzdaiz gyawj de, gungj hwet cam:“Gyawz ok lwed?”

“Lungz Gveiz!”

“Gizneix……”

Bohgoux fwngz ndeu duet buh de, gou iet hoz baez yawj. Ai! Najaek caeuq gwnz mbaq song giz cingq lae lwed hoengzfwgfwg.

Doeklaeng bohgoux daj ndawrug byaij okdaeuj, gou song fwngz goemq naj mbouj gamj yawj, suksiemj byaij daengz henz ndang daiq, rex daiq haeuj ndawrug bae.

“Ahbyauh!” Bohgoux heuh gou, “Bae dawz nonjhuz daeuj.”

Mwhneix gou gaenq dingh lai di lo, riengjret dawz nonjhuz gvaqdaeuj.

“Bat, gaen!” Bohgoux youh heuh:“Guh vaiqdi.”

Gou doq dawz song yiengh neix daeuj, bohgoux gaenq dawz song bingz ywmba cuengq youq gwnzdaiz, doq binj genbuh doq heuh gou ndingq raemxgoenj haeuj ndawbat, caiq aeu gaen dumz raemx bang Aulungzgveiz swiq giz lae lwed najaek.

Aulungzgveiz mbouj gyangz sing ndeu, ning hix mbouj ning saekdi.

“Ai, caen bamz, lij bang ndaek vunz neix dwk yw……” Gou mumj- gyumq ndaejnyi daiq nam, de caeuq daxmeh ndoj youq ndawrug ienq bohgoux.

Bohgoux doq nyaengq doq yawj saeknaj Aulungzgveiz, gou couh ndwn youq henz bang faenj gaen, yaep he raemxsaw ndaw bat cungj bienq ndaej hoengzfwgfwg lo.

“Baenzlawz deng sieng?” Boh- goux fouz gyaeuj fouz rieng dwk cam coenz he.

“Deng caeggeq camx song mbat.” Aulungzgveiz dap.

“Mwngz caen dwg——?”

“Ai!” Aulungzgveiz danq gaemz heiq ndeu, laep da naeuz, “Gij saeh neix dauqdaej ndaej sat lo.”

“Ngamq daj gwnz bya roengz- daeuj?”

“Mbouj deng, daj laeng miuh- saenzvangz gvaqdaeuj.”

“Seizlawz dauqma?”

“Haemhlwenz.”

“Vihmaz ngaiznyed daengz mwhneix cij daeuj ra gou?”

“Miz seiq ndaek caeggeq riengz gou roengz bya.”

“Ha.”

Gou doeksaet yat, Aulungzgveiz dwg caeggeq dahraix, yienghneix seiq ndaek caeggeq ne?

“Gou—— Ai!”

Bohgoux dawz gaen uet deng gij baksieng de lo, de loq saenz.

“Ngoenzde hwnj bya bae bang Ahveij caiq ra ywdoj—— Ai, Ahveij mbouj miz saeh luba?”

Gou ngeix, ndaek vunz neix caen rox cang ngawz, soengq gij ywdoj miz doeg hawj Ahveij gwn, lij cam Ahveij ndei caengz ndei?

“Mwngz daegdaengq gouq Ahveij roxnaeuz haih de?” Bohgoux daengx fwngz cam de, gij sing gig naekcaem.

“Baenzlawz baenzneix gangj ne?” Aulungzgveiz byaengq da cim bohgoux.

“Guh saeh mbouj ndaej daeuq lai, Mehveij vihmaz lij lix, dwg aenvih Ahveij……”

Aulungzgveiz cengq ndang yaek naengh soh, cix deng bohgoux lanz de.

(caengz sat)