Gou gyaez va, youq ndaw gyoengq va gyaeundei, gou ceiq gyaez valwgbaenq.

Valwgbaenq gig gyaeundei. Gij saek de miz saek maeq damh、saek aeuj damh daengj. Baenz duj baenz duj valwgbaenq lumj dah sien gyaeundei nei angqfaengz ciengq go diuq foux, youh lumj baenz aen baenz aen hauhdoengz iq hoengzhoengz heuheu. Ndaw limqva miz geij gaiq simva, gangj daeuj gig geizheih, gij simva wnq cungj dwg henjgim, hoeng sim valwgbaenq lumj nae hau, youh lumj duz mbaj hau gyaeundei nei, gij simva neix miz mbangj sang, miz mbangj daemq, miz mbangj soh, miz mbangj gungj. Yawj hwnjbae couh lumj geij aen simva humx gvaengz he guhcaemz, geijlai angq ha! Sijsaeq baez mup, couh mup daengz raq feih hom damhdamh ndeu. Fwn doek gwnzde, giet baenz baenz aen baenz aen cawraemx.

Valwgbaenq mbouj lau dwgrengz mbouj lau vunz ienq. Gyanghwnz sam diemj cung, valwgbaenq couh hai va lo, de hwnj baenz caeux, de boux dai’it hai va, hawj daxgoeng daengngoenz ngonzyawj. Valwgbaenq gig giemhaw, de soqlaiz mbouj caeuq vunz ceng gyaeu, valwgbaenq cawzle hwnj caeux hai va, hawj daxgoeng daengngoenz ngonzyawj, daengz banhaemh doengngoenz doek bya, gyoengqde youh bemhbongz yaek hai, dahcej ronghndwen iet aen gyaeuj okdaeuj, haenh naeuz: “Dahnuengx valwgbaenq, mwngz caen gyaeundei!”

Gova go’nywj gofaex canggyaeu gwndaenj raeuz, gyoengqde couh lumj baenz duz baenz duz cinglingz iq, hawj daihdeih daiq daeuj hoenghhwd!

(seiq nienzgaep Sangh Ginhyenz)