Moix boux vunz ndawsim cungj miz di mimiz, aiq dwg saeh siengsim doenghbaez, aiq dwg vahgyaj simndei…… Ndawsim gou hix yo miz aen mimiz mbouj hawj vunz rox ndeu, baez siengj hwnj couh roxnyinh najmong.

Ngoenzde dwg ngoenz singhgizhaj, banringz cuengqhag ma ranz, gou ganjgip sij cozyez, aenvih daxmeh wngqcingz gou, coumued sij sat cozyez ndaej yawj denyingj《Hahli·Bohdwz》ciz ndeu. Vihliux caeux di ndaej raen Hahli·Bohdwz gou gyaez haenx, gou vaiqdangq sij cozyez, caen siengj ciq gaiqfapswd daeuj yungh mbat ndeu. Hoeng diuz cimcung gwnz aencung lumj daegdaengq caeuq gou doxdingj nei, byaij ndaej gig vaiq, mbouj yaep ndeu couh daengz banhaemh bet diemj cung lo. Ai, saw Yinghyij gou lij caengz boih caeuq maegsij ne, yawjdaeuj ngoenzneix mbouj ndaej yawj 《Hahli·Bohdwz》 lo. Hoeng gig vaiq, aen “gveijgeiq” ndeu sawqmwh ndonj okdaeuj. Ngoenz- neix daxmeh gyaban, mboujmiz gou cigciep cau govwnz suenq lo, couh mbouj maegsij lo, gou guj daxmeh hix mbouj miz seizgan genjcaz gou boih saw. Hoeng youh siengj, mbouj ndaej, neix mbouj dwg yaeuh daxmeh ha? Gou gig veiznanz. Seizde, Fuzdimoz dwgcaengz ndaw《Hahli·Bohdwz》okyienh ndaw uk gou: “Ngoenzneix, gou couh caeuq Hahli·Bohdwz gietdai lo, mwngz lij mbouj ganjgip daeuj yawj dou doxbuek ha?” Gangj sat riuhaha couh bae’ngwtngwt. A, gou caiq hix nyaenx mbouj ndaej, rubrab cau govwnz baez ndeu, couh hai dennauj yawj denyingj lo.

Seizgan vuenyungz cungj dwg dinjded, gou ngamq yawj sat denyingj, lij caengz daj gij angqyangz Hahli·Bohdwz hoenx hingz Fuzdimoz singj daeuj, daxmeh dauqma lo. Gou ganjgip gven dennauj, cawjdoengh caeuq daxmeh veibau: “Meh, cozyez gou cungj guh sat lo, mwngz daeuj genjcaz ba!” Daxmeh angq dwk naeuz: “Ya, ngoenzneix baenz vaiq couh guh sat cozyez la, saw boih sug caengz?” Gou baez dingq, sim sikhaek diuq ndaej engq vaiq, dai lo, caeuq doxmeh nyinh loek ba? A, mbouj ndaej, daxmeh aiq ndaq gou bw, vanzlij mbouj hawj gou coumued yawj denyingj bw. Hoeng mbouj nyinh loek, saeklaeuq daxmeh heuh gou boih saw hawj de dingq gou baenzlawz guh ne? W, wnggai mbouj heuh gou boih saw lo, baenz gvaiz lo, daxmeh wnggai mbouj genjcaz lo. Yienghneix gou gyajcang caemdingh: “Boih ndaej lo, gou ngoenzneix leihyungh seizgan roengzdangz guh mbangj cozyez he, ndigah ma ranz le cozyez couh mbouj lw geijlai lo.” Daxmeh dingq le, gig angq: “A, daiq ndei lo, lwg gvai rox cagaenj seizgan lo! Gvaiz lai lo, mwngz ganjvaiq ninz ba, daxmeh saenq mwngz.” Aeya, cungj suenq ndoj gvaq baez ndaq ndeu lo, gou cuengq gaemz heiq hung ndeu, ganjgip gven daeng hwnj mbonq ninz. Hoeng ninz gwnz mbonq, gou cungj ninz mbouj ndaek, “daxmeh saenq mwngz” coenz vah neix itcig heux youq ndaw uk gou. Daxmeh yienghneix saenq gou, hoeng gou cix yaeuh de, couh dwg vihliux caeux di yawj denyingj. Gou caen siengj sikhaek cung gvaqbae, lwnh saehsaed hawj daxmeh, hoeng siengjsiengj, danghnaeuz daxmeh rox gou yaeuh de haengjdingh gig siengsim, suenq lo, couh hawj gijneix ciengzlwenx baenz aen mimiz ndeu ba! Haetcog gou itdingh caeuxcaeux hwnqdaeuj laeglemx boih saw sug bae.

Gienh saeh neix yienznaeuz gvaqbae haemq nanz lo, hoeng baez siengj hwnj aen mimiz neix, gou youh nyaenq youh nyapnyuk. Gou itcig aeu baezneix guh hit, caiq hix mbouj yaeuh gvaq vunz lo.

(Gyanghsuh Swngj Nanzgingh Si Lahsaz Lu Siujyoz haj nienzgaep Lij Cwngzhau)