“Byawz?” Bohgoux ndwn youq laeng bakdoulaux cam.

“Baujcangj, dwg gou, Lungz Gveiz!”

Hai! Gou doeksaet yat, yenzlaiz dwg Aulungzgveiz dauq lo, haujlai ngoenz mbouj ndaej raen de, seizneix sawqmwh youq gyanghwnz buet daeuj roq bakdoulaux ranz gou, dauqdaej vih maz saeh ne?

“Mwngz baenzlawz seizneix daeuj roq dou?” Bohgoux fwngz ndeu nyaenx binqdou, daj gehdou coh baihrog cam de.

“Miz saeh gig youqgaenj, bauj- cangj, vaiqdi hai dou.”

“Ngoenzcog ranzrongh le menh gangj mbouj ndaej ha?”

“Yienghhaenx couh ganj mbouj gib lo!” Aulungzgveiz gig simgip.

“Lungz Gveiz, gou saenq mwngz.” Bohgoux naeuz,“Gou soqlaiz doiq mwngz ndei, maqmuengh mwngz gaej youh hawj ndaw mbanj nyex saeh.”

“Gaej you, gaej you, gij saeh gou cungj guh baenz le. Mwngz hai dou couh ndaej!”

Bohgoux dawz rwz nem youq fajdou gwnzde dingq le yaep he, fwngz ndeu lumh binqdou, cingq lawq hai mbouj hai dou.

“Baujcangj!” Aulungzgveiz youq baihrog youh heuh le sing ndeu, gij sing gig iqet.

Daiq dawz aen daengyouzhaeu ndeu saenzdedded dwk byaij gvaq- daeuj, sing daemq cam le coenz:“Dwg byawz ha?”

“Dwg Aulungzgveiz.” Gou han sing he.

“Gaej hai——”

Gij vah daiq ngamq ok bak, bohgoux gaenq dawz binqdou roengz- daeuj lo, bakdoulaux “yiya” sing ndeu, deng gaex hai lo.

Riengz raq rumzliengz he, gou yawjraen aen ngaeuz daj gehdou laemx haeujdaeuj, aen daengyouzhaeu daiq gwnz fwngz bibuengq le song baez, bohgoux song fwngz baez mbe, umj dawz aen ndang haenx lo.

“Lungz Gveiz! Mwngz baenzlawz lo?” Bohgoux diemheiq fofo cam.

“Gou—— gou——” Aulungz- gveiz gyangz dwk.

Daiq dawz daengyouzhaeu byaij- saensaen dwk gyawj yamq ndeu, gou doq gven dou, dangj raq rumzliengz gyanghwnz daj rog bongj daeuj.

“Ai! Lwed!” Daiq swenj hwnj- daeuj, aen daengyouzhaeu ndaw fwngz de yiemjyiemj doek youq gwnznamh.

“Meh, gaej swenj!” Bohgoux aiq gaenq yawjraen gij lwed gwnz ndang Aulungzgveiz lo, roengzrengz rex de, menhmenh byaij coh ndawding.

Gou baez raen gij lwed ndaem- aeuj, couh lau dwk song ga unq caez, daiq hix ndwn youq gizhaenx nyengh dwk, aen daengyouzhaeu ndaw fwngz de lumj bungz deihdoengh nei gwq bibuengq mbouj daengx.

Bohgoux rex Aulungzgveiz daengz ndawding naengh youq gwnz eijgvaengx, raen gij yiengh gou caeuq daiq, doq byaij gvaqdaeuj coux aen daengyouzhaeu, fwngz ndeu rex daiq, sing iq naeuz:“Meh, mbouj youqgaenj, mwngz bae yietnaiq faenh mwngz ba.”

Song coenz vah neix hawj gou fukdauq lo, bohgoux baenzneix caem- dingh hawj gou najmong, hoeng youh mbeihung hwnjdaeuj, riengz bohgoux byaij haeuj ndaw ding bae.

(caengz sat）