Roen gauhdez sohsoh,

Mbouj rox gijlawz go;

Ndonj gvaq cien fanh bo,

Doz vunz mbouj rox baeg.

Naengh aen ci gauhdez,

Raen lwgnyez ciengq go;

De ciengq gyauyuz moq,

De doq goj saenqhwng.

Naengh gauhdez bae youz,

Bouxboux daenj buhmoq;

Ndang saw vunz youq soh,

Roxsoq bae dongx vunz.

Ci gauhdez ok can,

Raen mbanjmbanj ranz moq;

Mbanjmbanj doeng daihloh,

Bo loeg faex youh heu.

Yawj ok cueng baihrog,

Raemxmok youq gyang bo;

Makgam henj baenzbyoz,

Raen cang loz hwnj ci.

Gauhdez bonghfwfw,

Yawj raen cwz doengzdaeuq;

Cwz lai vunz souhgou,

Sou ngaenzcienz roengz daeh.

Gauhdez gvaq deihgoengq,

Soengq gou daengz Bwzswz;

Sing fwen cienz haeuj rwz,

Swz lumj roegciu heuh.

Ndaw ci miz vunz naeuz,

Ngoenzneix bouxdaeuz daeuj;

Gingq aen ciet fungsou,

Gwn laeuj fwen doengzdoiq.

Gauhdez gvaq Bingzgoj,

Gou ndiephoj ranzgaeuq;

Bouxboux hwnj ranzlaeuz,

Diuqfoux caiq ciengq go.

Gauhdez daengz Namzningz,

Haeuj singz mbouj rox roen;

Gyanghwnz lumj gyangngoenz,

Vunz foenz lumj raemx dah.

Gauhdez raezrangrang,

Ndaej cang geij cien vunz;

Cungguek mbouj caiq unq,

Ndwn hwnjdaeuj mbouj laemx.

Gauhdez laebdaeb byaij,

Daiq gou bae Baekging;

Vih Dangj vih lwgminz,

Gou itdingh bae ganq.

Gauhdez daengz Baekging,

Sim gou yungz lumj faiq;

Ngeihcib Daih ciuhai,

Vunzlai bouxboux angq.

Naengh gauhdez caen ndei,

Seizseiz ngeix daengz ciuh;

Aen sim riengz Dangj diuq,

Mbouj loeng guh ciuh vunz.

Siengj song aen bak bi,

Miz vah gangj mbouj liux;

Vuenyungz sanq baengz geu,

Gangj mbouj liux mbouj caenh.

Va ndawsuen hai rim,

Beksingq angq raixcaix;

Fwen coux Ngeihcib Daih,

Byaij haeuj ga roen moq.