“Daiq.” Gou yawj bohgoux youh mbouj oksing, couh gag bang bohgoux dap, “ndawranz de miz haujlai ngwzdoeg, byawz gamj bae lid?”

“Vihmaz mbouj ram aen loengz ciengx ngwzdoeg okdaeuj aeu feiz coemh dai gyoengqde ne? Ce youq gizhaenx saeklaeuq ngwzdoeg buet okdaeuj baenzlawz suenq?” Daiq yienznaeuz naj coh gou, gij vah de cix dwg naeuz hawj bohgoux dingq.

“Byawz gamj bae ram ha?” Daxmeh youq henz cabbak le song coenz, “de aeu maz loengzdietsienq ciengx duzngwz? Gangj mbouj dingh baez ram gij daej loengh couh laeuh ne!”

“Gou couhdwg lau gijneix ha.” Bohgoux ciep gij vah daxmeh gejnaeuz, “mboujyawx coq youq gizhaenx mbouj bae ning, gou gaenq lwnh hawj vunzmbanj lo, mbouj ndaej haeuj aen ranzdaemq ndawde bae.”

“Byawz gamj bae?” Daxmeh naeuz, “lauheiq coengzlaiz hix mbouj miz byawz gamj haeuj ndaw bae yamq ndeu ha.”

Gou cingq siengj naeuz gou gaenq youq ndaw ranzdaemq haenx naengh le haujlai nanz, bohgoux couh ciep gij vah daxmeh gangj, “hawj doenghgij ngwzdoeg daengz dungx iek seiz gag doxhaeb, doeklaeng cungj daiiek caez.”

Daxdaiq gaemz doek gaemz cit doengzien, coenz vah maz hix mbouj gangj.

Daihngeihhaj Dauq- cungz Roxnaj Aulungzgveiz

Hwnzde gou fangzhwnz loqdwg- lau, loqraen haujlai duzngwz geuj youq gwnz ga gou, gou deng hwk ndaej daengx ndang hanhheu, hemq Aulungzgveiz vaiqdi daeuj gaemh duzngwz bae, hoeng Aulungzgveiz cingqngamj mbouj youq henzgyawj. Sawqmwh miz duz ngwz he lumj genfwngz baenzneix hung daeuj haeb dungx gou gaemz he, gou swenj hwnjdaeuj.

Gou ndiu lo, aen sim lij diuqbubbub, gwnzndang cungj hanh dumz caez.

Hoeng gou lij caengz ndiu caez, luqlawq ndaejnyi baihrog miz vunz roq dou, caiq yawj henz ndang, daiq gaenq naengh youq gwnz congz, de beij gou lij ndiu gonq lo.

Sing roq dou yied daeuj yied gip, gengxdoengz bakdoulaux bongx dwk fajdou, youq gyanghwnz caemrwgrwg, gij sing neix daegbied coegrwz.

Bohgoux ninz youq rug henz hix ndiu lo, de cingq caeuq daiq gangj vah, daiq sing iq daezsingj de coenz ndeu:“Gaej hai dou.”

“Gou bae yawjyawj, lauheiq dwg ranz lawz oksaeh lo.”

Bohgoux daenj haizdaz, byaij coh bakdoulaux, gou riengjret diuq roengz lajcongz, riengz youq baihlaeng de, gyanghwnz laepsaengsaeng, daiq yaek rag gou dauq gaenq mbouj gib lo.

(caengz sat)