Dangj hai Ngeihcib Daih,

Bouxboux maij ndawsim,

Saeh neix naek lumj gim,

Lwgminz bouxboux angq.

Dangj hai Ngiehcib Daih,

Lumj va hai rim biengz,

Bouxcuengh gaen bae riengz,

Ciengq fwen daeuj goenghoh.

Bak lai bi gvaqdaeuj,

Raeuz baengh dangj gwndaenj,

Yienghyiengh guh ndaej baenz,

Raen ndei caez ndei doh.

Miz dangj daeuj daiqdaeuz,

Raeuz mbouj you mbouj heiq,

Ngoenzneix miz fukgveiq,

Diendeih hix dopfwngz.

Gaxgonq bae hoenxciengq,

Mbouj lau sieng lau dai,

Gungcanjdangj ak lai,

Vih vunzlai buekmingh.

Dangjcunghyangh daiqroen,

Hoenx cien bing fanh max,

Sinhoj hix saet gvaq,

Gaem dienhyah daengz fwngz.

Miz daemz cij miz bya,

Miz naz cij miz haeux,

Gungcangjdangj okdaeuj,

Raeuz cij raen mbwnrongh.

Ndawsingz dwg laeuz sang,

Gyanggai roenhaw moq,

Ci gvaq doh ciep doh,

Nauh’oo gvaq ngoenz.

Lajmbanj ranzlaeuz moq,

Goengloh bingz youh gvangq,

Vunzmbanj bouxboux angq,

Fwen hap langh ndawrungh.

Cungguek ndaej bienqvaq,

Daihgya bouxboux rox,

Mbouj miz dangj yinx loh,

Gungzhoj nanz ndaej duet.

Hajcib roek minzcuz,

Hajcib roek duj va,

Miz dangj daeuj danggya,

Va doxgiet hai hoengz.

Gag minzcuz beixnuengx,

Gaen riengz Dangjcunghyangh,

Miz saeh couh doxbang,

Lumj ranz ndeu ityiengh.

Miz feihgih hwnj mbwn,

Miz ruz cunz gvaq haij,

Guekgya raeuz leixhaih,

Daihdaih cungj fouqgiengz.

Gungcanjdangj lumj boh,

Yienghyiengh goq haeuj sim,

Sinhoj vih lwgminz,

Mbouj in rengz in hanh.

Gungcanjdangj lumj meh,

Miz de cij miz raeuz,

Ranz onj baengh diuz saeu,

Guek gyaeu baengh miz dangj.

Ngeihcib Daih ciuhai,

Vunzlai bouxboux angq,

Va baengh ndit cij rang,

Raeuz baengh dangj cij yungz.

Caeuq dangj caemh diuz sim,

Cien gim vuenh mbouj nyaih,

Raeuz miz dangj daeuj daiq,

Mbwn haih hix mbouj lau.

Gungcanjdangj hengz saeh,

Ndei rwix cungj faenmingz,

Cwngcwz diuzdiuz cingq,

Raeuz itdingh ciuq hengz.

Gungcanjdangj caen ndi(ndei),

Vix loh gwnz loh laj,

Youq ngoenz ngeix bae naj,

Guekgya engq hwngvuengh.

Raeuz beksingq Cungguek,

Buekmingh gaen dangj byaij,

Miz Dangjcunghyangh daiq,

Fanh daih gvaq ngoenzndei.