Seizneix, gou cij roxnyinh vunzhung dauqdaej dwg vunzhung, lwgnyez caen dwg lwgnyez, vunzhung miz yawjfap caeuq cawjcieng bonjfaenh mbouj doxdoengz, daiq miz gij yawjfap de, bohgoux gag miz duenqdingh. Gou nyinhnaeuz gij yawjfap daiq mbouj miz maz loek, Aulungzgveiz itdingh buet hwnj bya bae ra “Vangzvaizgvaiq” mbouj dauq lo, hoeng gij yawjfap bohgoux hix gig miz dauhleix, yawj ndaw ranzdaemq haenx, Aulungzgveiz lumjnaeuz caengz buetdeuz, hoeng gou boux lwgnyez iq, cix mbouj miz gij yawjfap bonjfaenh, hix faen mbouj ok dauqdaej dwg daiq deng roxnaeuz dwg bohgoux deng.

Hoeng, saedsaeh cij ceiq deng, Aulungzgveiz buetdeuz dahraix lo, sam ngoenz cungj caengz dauqma.

Sam ngoenz neix, daiq baez raen bohgoux couh mboensaex, gvaiq bohgoux mbouj dingq gij vah de, doeklaeng hawj Aulungzgveiz boux vunzrwix neix baenzneix soengsetset buetdeuz lo, caen dwg cuengq duzguk dauq bya, gij hux daengzcog mbouj rox caenh!

Bohgoux cij ngaemgyaeuj, saek coenz mbouj han, mbouj miz vah dap.

Ndawmbanj, gyoengqvunz cungj gig ndatheiq, miz vunz naeuz aeu lid aen ranzdaemq Aulungzgveiz bae, bohgoux gwq gienq, naeuz simdingh gonq, gvaq mboengq ngoenz menh gangj. Yaucangj hix bang bohgoux oknaj bae gienq vunzmbanj, yienz- naeuz caezgya gig hozhwnj, cix aenvih bohgoux caeuq yaucangj, caemhcaiq ndaw ranzdaemq Aulungzgveiz miz haujlai ngwzdoeg, byawz hix mbouj gamj bae ning gonq, ndigah gij saeh neix couh camhseiz daengx roengz- daeuj lo.

Ngoenz daihseiq, dungx Ahveij ndei caez lo. Gij baksieng lwgfwngz de deng ngwzdoeg haeb gaenq dwk ywdoj lo, gyoengqvunz raen lwgda Simj- mehveij mbouj gawh lo, Ahveij hix buet okdaeuj guhcaemz lo, gij ienqhaemz doiq Aulungzgveiz couh menhmenh noix lo, bae nyaengq hongnaz lo.

(caengz sat)