Mbwk:

Nanz mbouj raen mwngz beix,

Miz maz saeh cig you,

Yienj yiengh naj saepsou,

Lij cien youz gaijmbwq.

Sai:

Saed vah lwnh mwngz nuengx,

Maqmuengh lai cauh ngaenz,

Deng vunzvaih yaeuh gwn,

Maex heiqhwnj doxbiek.

Mbwk:

Laemx le youh caiq hwnq,

Ciepswnj guh ndaej hwng,

Ngwz haeb raen cag saenz,

Lawz ndaej daengz hwnghoengh?

Sai:

Mbouj dwg boq daihvah,

Ndang seuq gvaq raemx riengx,

Seng’eiq gag youq mbiengj,

Sim liengz lumj rin dah.

Mbwk:

Beix doegsaw baenz ranz,

Dungx cang haujlai maeg,

Dungxcaiz vunz mbouj caeg,

Raemxraeg nanz naih mwngz.

Sai:

Bi’ndwen seiqcib lingz,

Mbwk fouzcingz lingh haq,

Caiq gangj dah youh dah,

Ndi haq ndaq gou dem.

Mbwk:

Lwgmbauq yiemz gou lem,

Lij miz yiemz hwetgungj,

Naeuz gou huk youh loengz,

Gou cungj nanz okhaq.

Sai:

Lwgmbwk lumj dujva,

Hai rim nga rim ngeiq,

Lwgmbauq bouxboux eiq,

Byawz mbouj feiq simgei?

Mbwk:

Beix gangj caen ndei dingq,

Gou simsingj leix re,

Daengz miz boux lwgnyez,

Deng gvan ce(vut) couh cuij.

Sai:

Nuengx gangj hix miz leix,

Vunz mbouj eiq faenleiz(doxbiek),

Miz maex leix ranz ndei,

Boux lwg ndaej meh gyaez.

Mbwk:

Vah dwg baenzneix gangj,

Gvan nga’ngangq mbouj coengz,

Vi genz daej da hoengz,

Gag ienq loeng baenz seiq.

Sai:

Miz yienz ndaej doxbungz,

Dwg mbwn roengz cawjeiq,

Gou gaenq nyouq daengz feih,

Ndawsim ei dangqmaz.

Mbwk:

Gou yakyawj lairaeuh,

Vunz mbouj gaeuj daengz gou,

Ngeix daeuj sim gag dou,

Mbouj baenz sou vaiqvued.

Sai:

Soeng dinfwngz gou swix,

Byaijluilui simhoengq,

Mbouj miz vunz caezdoengz,

Cungj mbouj soeng seizneix.

Mbwk:

Gag ngeix gou swhgeij,

Saedcaih seih gig nanz,

Ngoenzngoenz ngeix hwnjban,

Vunz mbouj han yungh gou.

Sai:

Byaleix diuq hwnj dan,

Byawz youh laengz ndaej gvaq?

Dahsau youq baihnaj,

Siengj coux dah bae ma.

Mbwk:

Roegenq daengz seizcin,

Angq ndaej mbindoudou,

Duzmeh riengz duzboux,

Vuen foux mbouj faenhai.

Sai:

Mbouj ndek hix mbouj leiz(liz),

Gwn raemxreiz cungj nyienh,

Sim’eiq hix mbouj bienq,

Roengzrengz sienq cauh miz.

Mbwk:

Ndaej caeuq beix gezvwnh,

Ninz gwnz oen hix eiq,

Ndawsim caenh vuenheij,

Go baenz seiq mbouj lumz.

Gap:

Mbwn lok imyuenz ndei,

Caen dwg meiz(miz) fukheiq,

Gap gvanbaz baenz seiq,

Ndawsim eiq dangqmaz.

Mwngz maij gou hix gyaez,

Youh doengzcaez haenq guh,

Saed guh mbouj gangjboq,

Caezcaemh coh baihnaj.