Banringz, daxbuz aeu duhheu daeuj ceh duhngaz, yaek guh bau hawj gou gwn. Gou dingqnyi le, ganjgip gvaqbae bang daxbuz. “Valala”—— gyoengq duhheu angqvauvau diuq roengz raemx bae, gig vaiq couh youq daej raemx ninzndaek fofo lo, mwngz naeuz gyoengqde gik mbouj gik?

Gaej yawj gyoengqde bouxboux cungj ninzndaek fofo, hoeng youq ndaw loq hix mbouj lumz gwn raemx bw. Mwngz yawj, gaenq miz mbangj duhheu duet “buhrog” heu bae lo, loh’ok aenndang hausag daeuj, naed caengz duet “buhrog” bae haenx, saek geubuh hix bienq damh lo, lumj baenz duz baenz duz cinglingz duet caengz saheu bae nei. Gyoengq duhheu bienq biz lo, gij “lwgbi” luenzlulu neix, caen dwggyaez ha! Gyoengqde miz mbangj lumj lwgnding ngamq seng okdaeuj nei, oiqiemiem, hawj vunz ndiepgyaez. Miz mbangj lumj boux cienghginh hung nei, enj aendungx hung ngauz gyaeuj bi rieng vifung vidvid. Gwnz ndang gyoengqde miz riz dek he, gyaeuj riz dek miz aen gak iq dinjded soemswd he. Daxboh naeuz gou nyi: “Neix dwg ngaz duhheu.” Danghnaeuz mwngz mbouj sijsaeq yawj, lij caen yawj mbouj raen, caen dwg gyoengq lwg’iq ganvad he.

Ngoenz daihngeih, youh miz mbangj duhheu gwn raemx imq lai aen dungx cengq dek lo, gij ngaz gyoengqde doxcanj did okdaeuj. Ngaz ceiq raez gaenq miz lizmij he raez lo, caen vaiq ha. Vuenh raemx le, gyoengq duhheu cungj mbouj caemdingh lo, yawj, gyoengqde miz mbangj riengz bien bat menhmenh daenq doengh, lumj youq ndaw raemx youzbyaij nei; miz mbangj youq dieggaeuq menh- menh baenq, lumj diuq duenh foux gyaeundei he; lij miz mbangj youq ndaw raemx fouzfouz caemcaem, lumj lienh goengfou nei…… Ndaw raemx benq angqyangz he, nauhyied raixcaix.

Ngoenz daihsam, gyoengq duhheu cienzbouh daenj hwnj buhhau lo, lumj dahsau daenj hwnj vunjsahau nei. Gyoengqde miz mbangj launyaenq ndoj youq gij ngaeuzraemh, miz mbangj cwxcaih dak ndit. Gyoengq duhheu byom lo, gyoengqde dawz yangjfwn cienzbouh gung hawj ngaz oiqiem de, dwg daxmeh geijlai fouzsei ha! Gyoengq lwgngaz gaenq maj raez sam seiq lizmij lo, caiq gvaq geij ngoenz couh ndaej aeu daeuj gwn lo, gou cungj miz di caj mbouj gib lo.

Ngoenzde banhaemh gou guh aen loq he, ndaw loq gou gwnz duhngaz gou caenfwngz ceh okdaeuj haenx, rox- nyinh daegbied vandiemz.

(Fuzgen Swngj Cenzcouh Si Anhhih Sisiuj seiq nienzgaep Vangz Bozmingz)