Youq gwnz loh bae hagdangz, aen bingzmuq hung gvangjgau henz loh, saek seiz ndaej raen aen ngaeuz gyaeu ndeu, gou baez nduj yawj raen, cix mbouj rox de dwg bouxlawz. Gou siengj rox de dwg byawz couh cam daxboh:“Boh ei, boh ei, dahcej gyaeu ndaw bingzmuq gvangjgau dwg byawz ne?” Daxboh yawj le, couh riu naeuz:“O, boux dahcej neix ha, de maenh’ak lai bw, deq mwngz cuengqhag ma, boh menh lwnh mwngz.”

Dauqdaej deq ndaej cuengqhag lo, mbat daengz ranz, gou couh ra daxboh, naemj hawj daxboh caeuq gou gangj aen goj dahcej gyaeu. Daxboh naihsim caeuq gou gangj: Boux dahcej gyaeu neix dwg Vangz Vwnzsiu, youq aen ranz lajmbanj Bazbez Yangh Denzyangz Gih doekseng. Ranz de gungzhoj lai, ndang bohmeh goj youq mbouj bienh, cix gag baengh haenq- rengz doegsaw gauj ndaej aen dayoz ndei, miz vunz simndei bangcienz dem, doeklaeng ndaej sat hag lo. Dahcej Vangz Vwnzsiu youq bi 2016 sat hag sozsw yenzgiuswngh le, gag dauq mbanjranz guhhong, bi 2018 Vangz Vwnzsiu dingq vah dangjcujciz, gag bauq aeu daengz Mbanjbwzniz Lozyez Yen guh daih’it suhgi. Youq mwh dwk ciengz ciengq haenqrengz duetgungz, de buekmingh guhhong. Miz doengzhag cam de:“Vihmaz mbouj youq hawsingz guhhong, ngengh dauq aen mbanjranz gungz ne?”De dap naeuz:“Haujlai vunz ok lajmbanj bae le cix mbouj siengj dauqma lo, aeu miz vunz dauqma cijndaej, gou couhdwg boux aeu dauq ndawmbanj.”Hoeng, hawj vunz sim in lai, lajbyonghhwnz bi 2019 ndwen 6 ngoenz 17, dahcej Vangz Vwnzsiu youq gwnz loh ganj dauq Mbanjbwzniz bungz raemxrongz, deng vut mingh lo. Dingq daengz giz neix, raemxda gou doeksoso. Dahcej Vwnzsiu lij baenz- neix coz, baenzneix gyaeu, cix mbouj caiq ndaej caeuq bohmeh beixnuengx youq ndijgaen saekbaez lo.

Youq mwh dwk ciengz ciengq haenqrengz duetgungz, dahcej Vwnz- siu mbouj lau haemzhoj buekmingh bae guh, raeuz goj aeu lumj dahcej Vwnzsiu nei mbouj lau hoj lai ok rengz. Vunz raeuz aeu gvaq ndaej miznaj, cix mbouj ndaej gag goq bonjfaenh, aeu vih guekgya、vih minzcuz、vih aenbiengz lai ok rengz. Gou dwg boux sausenhduiyenz, aeu daj iq riengz dangj byaij、dingq vah dangj, aeu lai hag lai rox, majhung le lumj dahcej Vwnzsiu nei haenqrengz guhhong, lai guh saeh miznaj.

（Yougyangh Gih Aisinh Siujyoz sam（5）ban Ciz Yuzvanj raiz Yangz Yenlinz hoiz）