Lwgnyez? Gou ceiq dwgcaengz Vunzhung nyinhnaeuz gou dwg lwgnyez lo, nanzdauh gou lij caengz majhung? Gou gaenq ndaej cibsam bi lo! Aulungzgveiz hix heuh gou lwgnyez, caen hawj vunz hozndat! Vunzhung cij rwix ne, lwgnyez cungj beij vunzhung gvaigvet lauxsaed, danghnaeuz Aulungzgveiz hix dwg lwgnyez, de baenzlawz gamj aeu gij ywdoj miz doeg daeuj haih Ahveij ne?

Yienznaeuz gou soqlaiz mbouj haengj Ahveij geijlai, hoeng mbouj- lwnh baenzlawz gou hix mbouj nyaenxsim aeu gij ywdoj miz doeg hawj de gwn, engq mbouj gangj seizneix de cingq deng ngwzdoeg haeb gig yung’yiemj! Doenghgij saeh doegsieb neix, hix cij miz gyoengq vunzhung yawj mbouj hwnj lwgnyez cij guh ndaej ok.

Mwh gou byaij ok ranzcauq, ndawding caeuq ndawrug ranz Ahveij gaenq caenx rim le haujlai vunzhung caeuq lwgnyez, yaucangjlaux hix daeuj lo. Gou caenx haeuj bae ra bohgoux caeuq daxdaiq, cij raen daxdaiq naengh youq gwnz eijfaexcuk, bohgoux gaenq mbouj raen lo.

“Daxdaiq, bohgoux ne?” Gou ndonj daengz henz ndang daxdaiq cam.

“Bae cawx yw lo.” Daiq fwd rag gou, sing daemq cam:“Ahbyauh, haxbaenh gij ywdoj haenx dwg Lungzbyauh caenfwngz hawj mwngz?”

“W, de lij heuh gou vaiqdi buet, vaiqdi soengq gvaqdaeuj.”

“Caen doegsieb, ciq fwngz mbaet nye, ciq cax gaj vunz!”

Gij vah daxdaiq hawj gou singj lo, yenzlaiz deng Aulungzgveiz leihyungh lo, de heuh gou soengq gij ywdoj daeuj, doeklaeng Ahveij dai le, caezgya yaek cazdawz bouxroengz- fwngz, de dang’yienz goj mboujnyinh, gij saeh neix ndaej doi seuqcingh caez, gangj mbouj dingh lij gaihux hawj gou dem, baenzbaenz gou lij dwg lwgnyez……

Siengj daengz gizneix, gou doq fid fwngz daxdaiq, bongh ok bakdou bae.

(caengz sat)