Ngoenzneix dwg daxboh biek gou bae sam hopbi, dauqngeix daxboh, aen sim gou lij in lumj deng fagmid heh, mbouj rox mbouj nyinh youh ngeix mwngz lo, daxboh!

Ndaejgeiq 2019 nienz 4 nyied 8 hauh banhaet, gou ciep ndaej dienh- vah daegnuengx. Ndaw dienhvah, daegnuengx sing daemq naeuz gou nyi, daxboh ngoenzlwenz cungj gwn mbouj ndaej haeux, yw hix dwk mbouj roengzbae lo. Sing daegnuengx daej- saekwk.

Gou baez cuengq dienhvah, mbouj gangj lai, couh caeuq bouxgvan caez buet bae ranzmeh. Baez daengz ranz, raen daxboh cij lw heiqnyieg he, gaenq gangj mbouj ndaej vah.

Raen yienghneix, gou couh rox gij cingzgvang daxboh mbouj ndei lo, itcig souj youq henz mbonq de. Mizseiz gueng raemx hawj de, mizseiz bang de uet hanh gwnz najbyak, mizseiz nyaenjnyaenj fwngz de.

Daxboh baenzbingh geij ndwen neix, cungj ninz mbonq, bae yihyen yawj le, canghyw naeuz gij bingh de yw mbouj ndei lo. Gyo henzndang de miz daxmeh caeuq daegnuengx hwnz- ngoenz buenx de fugsaeh de.

Daxboh soqlaiz youh ceiq gwn ndaej hoj nyaenx ndaej in, baenzbingh mbouj hemq hwnj hemq roengz. De ninz mbonq seiz, gou mbouj ndaej dwgrengz ganq de geijlai, ndaejhoengq couh bae yawjyawj de, de hix rox gou nyaengq, ndaej raen gou da ndeu caeuq gou gangjgangj vah couh sim- angq lo.

De bak gangj swhgeij mbouj miz maz saeh, heuh dou mbouj yungh ciengzseiz bae yawj de, gizsaed ndawsim de ceiq niemh dou, lau dou baenq bae baenq dauq baeg lai.

Daxboh daj ndwencieng roengz- bingh daengz ngoenzneix, gou moix aen ngoenzsinghgiz cungj caeuq boux- gvan daiq lwg dauqma yawj de.

Gij heiq de yied daeuj yied nyieg, doeklaeng yaek miz yaek fouz, daengz gyanghaemh 23 diemj 18 faen, de couh caeuq dou ciengxlwenx doxbiek lo.

Gou hat sing hung heuh:“Daxboh! Mwngz baenzlawz ndaej yienghneix couh bae lo…… Gou siengsim dangqmaz, gij raemxda lumj duh hung nei daj ndaw lwgda lae roengzdaeuj, ndawsim lumj naed raemx gat mae nei doek roengz dieg dek lo.

Gou doq daej doq swiq baez ndang ceiq doeklaeng hawj daxboh, daenj “buhsien” hawj de.

Yawjraen daxboh dinghdingh ninz youq gizde, gou caen siengj rag fwngz de, caeuq de caiq gangjriu!

Daxboh dwg boux daihgo, lij iq seiz, de cungj guh yienghndei hawj haj beixnuengx yawj. Youq mwh baengh goengfaen gwn ngaiz, daxboh youq ranz ganq dahnuengx daeg- nuengx, daengz seiz lij gueng mou, hongranz cungj dwg de guh liux, hawj daxbuz daxgoeng ansim bae guh hong reihnaz, mboujnex, ndawranz baenzlai vunz, gwn maz!

Lajmbanj dou miz aen gvenq he, danhfanz miz begsaeh, cungj aeu cingj goengdauh daeuj guhfap, caencik gyae’gyawj cungj daeuj soujhauq, ciengz fapsaeh he roengzdaeuj aeu guh geijcib daiz byaek, aeu miz haujlai vunz daeuj bangfwngz. Daxboh geq lo, ndangdaej yied daeuj yied nyieg, hoeng gij saeh hung saeh iq ndawmbanj de cungj cuengq mbouj roengz.

Bide seizdoeng, ndawmbanj miz begsaeh, cingqngamj daxboh ndang mbouj cwxcaih, hoeng de naeuz:“Hong rap hong ram guh mbouj ndaej, hong din hong fwngz cungj guh ndaej, mbouj caj bouxcawj daeuj heuh, de couh gag gvaqbae ra hong guh lo. Lwgsau lwgmbauq ndawmbanj cungj okrog bae dajgoeng dauq mbouj ndaej, mbouj miz geijlai vunz daeuj bang- fwngz, daxboh gag ndwn okdaeuj guh canghcawz, boux dan ronq noh. Bouxronqnoh hwnzngoenz mbouj ndaej yietnaiq geijlai, dwg ciengz begsaeh ndawde faenh hong ceiq sinhoj ndeu, saeh neix gvaq le, daxboh youh deng soengq bae yihyen lo.

Vunz ciengz gangj “vunzndei ciuhvunz bingzan”, daxboh lij lix seiz cungj simndat simndei bae bang vunz, vihmaz gwnzmbwn mbouj hawj de lai souh ne?

Ndaejgeiq 1995 nienz 7 nyied 12 hauh, dwg ngoenz gou ciengxlwenx mbouj ndaej lumz. Gou sou ndaej mbaw sawdunghcih daj Gvangjsih Minzcuz Cunghdwngj Conhyez Yozyau geiq daeuj, dangseiz gou sim’angq dangqmaz, hoeng caencik cungj gienq daxboh:“Lwgmbwk ma, mbouj yungh doeg baenzlai saw, daengzcog majhung le hix aeu haq okbae, beg vih caen’gya dajsuenq……” De ngeix le haujlai nanz, doeklaeng lij genhciz soengq gou bae doegsaw.

De daengq gyoengq beixnuengx dou:“Gou aenvih mbouj rox saw, gwn haemz gwn hoj baenz ciuh vunz. Mboujlwnh baenzlawz dwgrengz, cungj aeu soengq sou bae doegsaw, couhsuenq gai naz gai rek hix aeu soengq.”

Daxboh vah ngamq sat, gou fwd gvih youq gwnznamh, raemxda laeled- led naeuz:“Boh, gou itdingh roengz- rengz doegsaw, mbouj hawj mwngz saetmuengh……”

Seizneix gou dang lauxsae ndaej ngeihcib sam bi, son gvaq hagseng rim doh lajmbwn, hix ndaej daengz mingzdaeuz lai daih. Hoeng, boux lauxsae son gou guh vunz guh saeh——daxboh cix bae lo……

Doeklaeng, gyoengq caencik baengzyoux ndaej siusik, couh daj gak dieg ganj daeuj diuqhauq.

Yungh sam ngoenz banh laex- cangq, liz ranz aiq goengleix ndeu, vih daxboh genj aeu gaiq diegmoh ndei hawj de ninz.

Daxboh ha! Geij bi neix daeuj, gou cungj haenqrengz buekguh yienghndei, mbouj hawj mwngz saetnaj!

Daxboh ha! Mwngz seizneix yienghyiengh cungj ndei? Ndang mwngz wnggai mbouj indot luba?

Daxboh, maqmuengh mwngz youq aen dieg wnq hix gvaq ndaej angqyangz, ngoenznaengz gangj goj guh riu, simhai simvuen.

Daxboh, maqmuengh mwngz youq lajnamh roxnyinh gij vah dahlwg gangj mbouj okbak, dahlwg niemh mwngz youq ndawsim.