Najranz daxdaiq miz diuz dah iq sawndik ndeu, ndawdah miz haujlai bya iq. Miz ngoenz ndeu, gou siengj bae gaeb bya, daxmeh dapwngq lo. Hoeng ndawranz mbouj miz muengxbya, baenzlawz guh ne? Yienghneix, dou dawz aenndij roh raemx dangqbaenz aenmuengxbya, yaek dawz bae ndawdah gaeb bya.

Daengz ndawdah le, daxmeh sien roengz haenzdah bae, yienzhaeuh gou maeuq youq haenzhamq, daxmeh siujsim yiyi umj gou roengz haenzdah bae. Gaen dwk, dou vid gavaq hwnj, couh roengz raemx bae. Bya iq gizneix caen coengmingz ha! Aenndij baez bungq najraemx, bya iq couh vaiqvet deuz bae. Gou caeuq daxmeh lauz le haujlai nanz, doeklaeng dauqdaej lauz ndaej sam duz bya iq lo.

Dawz bya iq ma ranz le, gou siengj ok aen banhfap ndei ndeu: Guh aen ranz cwxcaih ndeu hawj bya iq. Yienghneix dou ra aen bingzsuliu hung ndeu, daxmeh dawz aen bingzsuliu daj cunggyang raed goenq, hawj bakbingz bienq hung di. Gou youq daej bingz coq caengz rin iq ndeu, menhcij raix raemx rim bae, cuengq song go nywjraemx oiqet heuyau roengzbae, yienghneix aenranz bya iq couh guh ndei lo!

Gyanghaemh, gou dawz aenranz bya iq cuengq youq laengranz daxdaiq, hawj bya iq sup hoengheiq singjsien liengzsi. Haet laeng, gou baez hwnq mbonq couh caj mbouj gip bae yawj bya iq. “A! Bya iq mbouj raen lo!” Dingqnyi gou sing hung hemq, daihgya cungj humx gvaqdaeuj yawj dwg yienghlawz lo. Aenranz bya iq lij youq dieg gaeuq, geizheih dwg, sam duz bya iq cix ngaeuz cungj mbouj raen lo.

Daxdaiq naeuz: “Byai iq aiq dwg deng duzdaek gwn luba.” Daxmeh naeuz: “Duzbya wnggai dwg ma ranz de lo.” Gou naemj, bya iq aiq dwg bae ma ra daxmeh de lo.

Bya iq dauqdaej bae gizlawz lone? Gou baenzlawz naemj cungj naemj mbouj doeng.

(Cezgyangh Swngj Hangzcouh Si Yozcwng Siujyoz ngeih nienzgaep roek ban Sung Denhyui)