Gou dwg seiq nienzgaep hagseng, dwg dahsau dwggyaez、vaiqvued he, hix dwg dahsau miz gak cungj gak yiengh yinxdaeuz he.

Fajnaj gou soemsetset lumj naed cehgva, gwnznaj fouq bwnda gungj- ngetnget lumj mbaw yangzliuj. Baihlaj bwnda maj miz fouq lwgda lumj caencaw, laj lwgda miz aenndaeng, giuzndaeng youh hung youh sang, gyoengqvunz cungj naeuz aenndaeng gou maj ndaej miz di geizheih. Couhdwg aenndaeng geizheih neix, de nyouq ndaej gig gyae. Mizseiz gou youq gwnzlaeuz, daxmeh youq lajlaeuz ndaw bakcauq cawj byaek, aenndaeng gou couh nyouq rox de cawj gijmaz byaek, couh heuh daxmeh aeu cuengq gijmaz boihliuh roengzbae, moix mbat gangj caengz sat, daxmeh cungj riuhaha dwk naeuz:“Duz malwg neix aenndaeng caen lingz, gou cawj gijmaz byaek cungj rox.”

Gou mizseiz sienxsubsub, hoeng mizseiz gig diuqbeiz. Miz baez ndeu, daeggo fwngz gaem soujgih cingq dwk youzhi gig mizyinx, gou yawjraen fwngz de dawz soujgih, baihlaj miz cozyez. Gou dinghdingh dwk yawj de, fatyienh de songda ngaez yawj dwk soujgih youzhi.

Mizseiz gou doegsaw bungz daengz bouxsij sij vahgawq sij ndaej ndei, gou ciengzciengz ciuq bouxsij sijfap daeuj sij doenghgo henzndang gou. Lumj dou hag le《Va’ngaeux》, gou couh sij 《Vadauz》; hag le 《Giuz Caucouh》, ndaw govwnz sij gwnz lanzgan gaek miz duzlungz yienghceij gyaeundei raixcaix. Hoeng, ndaw govwnz cix sij miz sam cungj, gou couh ciuq govwnz sijfap ngeixsij: Miz di gaek miz duzlungz hung caeuq duzlungz iq, gyoengqde lumj song mehlwg naengh youq gizhaenx gangj- goj; miz di gaek duzlungz he naengh youq gizhaenx, lumj cimyawj bya- raemx gyaeundei lajmbanj raeuz……

Gij gyaez gou gig lai, miz veh dozveh、guh soujgungh、ciengq go、diuq foux……Doenghgij neix, gou ceiq gyaez veh dozveh. Vunz yawj raen gou veh dozveh, cungj haenh gou veh ndaej ndei, gou veh fuk doz《Ranzmbanj Gou》, bae camgya ndaw yienh siujhagseng veh dozveh doxdax, lij ndaej daih’it mingz ne.

Gou ndei rwix cungj miz, gij ndei gou aeu hag roengzbae, gij rwix gou aeu vuetdeuz, hag gij ndei bouxwnq daeuj bouj gij rwix swhgeij. Maq- muengh daihgya caeuq gou guh baengzyoux ndei.

(Vujsenh Yen Dungzlingj Cin Sinhlungz Siujyoz seiq nienzgaep Danz Mingzsenh, boux lauxsae son- gyauq Lungz Ging’yuz)