Ngoenzsinghgiz, gou caeuq daxmeh daeuj- daengz lajmbanj mbaet byaekrwzvaiz. Daxmeh cingq nyaengq dwk, gou yawjraen giz mbouj gyae miz gaiq naz ce fwz ndeu, miz gyoengq bit ndeu cingq youq gizde ra gwn. Yienghneix, gou couh angqfwngfwng buet bae coh gyoengq bit neix, byawz rox, gyoengq bit neix raen gou buet gvaqdaeuj, lumj duznou raen duzmeuz nei, sanq deuz lo.

Gou lwgda baez baenq, sikhaek buet dauq- ma dawz gaem byaekrwzvaiz ndeu gvaqdaeuj. Gou mbiq gap byaek ndeu, menhmenh byaij gyawj gyoengq bit. Gij bit dam gwn neix hix mbouj lau gou lo, byaijngadngad humx gvaq- daeuj, cib lai aen bak benjbwd doiqcinj mbawbyaek mbouj dingz ciengj gwn. Cij yaep ndeu, gaem byaekrwzvaiz couh deng gyoengq bit gwn ndaej cij lw ganjbyaek hausak lo.

Gou gouz daxmeh ndaej song gap byaek, daxmeh doiq gou naeuz: “Mbouj cinj caiq aeu lo!” Gou naemj: Bit ha, neix dwg haeuxcaeuz doeklaeng sou lo, gou mbouj ndaej caiq baenzneix daihfueng youz sou gwn lo. Gou dawz byaek sik baek be iq, menhmenh gueng gyoengqde. Sawqmwh, gou yawjraen gok naz miz aen rungzbit ndeu, couh siengj loengh gyoengq bit mbat he. Gou gveng di byaek he haeuj ndaw rungz bae, dawz mbiengj rungz he ndiengq hwnj, aenbak mbouj dingz hemq lili, yaeuh gyoengq bit ndonj haeuj rungz bae. Mbouj siengj daengz gij bit cinglingz neix canggyaj yawj mbouj raen, duz ndeu cungj mbouj hwnjdangq.

Gou loengh mbouj baenz, cij ndei maeuq roengzdaeuj, baenz be baenz be gveng byaek daengz baihnaj gyoengq bit bae. Mwhde, duz bitmong he singq gip lai, gingqyienz iet hoz raez de daengz fwngz gou, bak baez hai, couh ciengj byaek ndaw fwngz gou. Gou ganjgaenj goemq dawz mbawbyaek, ndwn hwnjdaeuj, mbwnjbak naeuz: “Mbei hung lai lo, lij gamj ciengj gwn! Seizneix, sou cijmiz riengz gou byaij, cij miz gwn bw!” Yienghneix, gou byaijnwdnwd, seiz mbouj seiz gveng di byaek. Gyoengq bit neix lumj duzngaeuz nei riengz gou byaij dahraix, aencaekhaex luenzlulu baez bi baez bi, yiengh- ceij caen ndeiriu.

Ndit ngeng ciuq youq gaiq naz neix, gou lumj sawqmwh bienqbaenz boux guekvuengz vifung vidvid ndeu, baihlaeng riengz doih veibingh gig cungcig ndeu.

(Swconh Swngj Nanzcungh Si Fuz- gyanghlu Siujyoz ngeih nienzgaep it ban Bauh Beilinz)