Baezgonq doxdax saw lo, duzdouq ndawsim itcig mbouj fugheiq, sim siengj: Gaxgonq gou doxbuet baiz- daeuz, diuq baez ndeu bae gig gyae. Yienghneix duzdouq bae ra duzgvi, naeuz dauqcungz doxdax, youh cingj duzciengh sienseng guh bingzveij, duzgvi doengzeiq lo.

Baezneix doxdax caeuq baezgonq mbouj doengz, baezneix dwg byawz daengz cib laeuz gonq byawz couh hingz. Duzciengh sienseng sing hung hemq naeuz:“Haidaeuz!” Duzdouq couh lumj diuz byaj myig hau ndeu, youh saet youh diuq buet bae coh gwnzlaeuz. Caiq yawjyawj duzgvi, de ndwn youq dieggaeuq mbouj doengh yawj duzdouq buet coh gwnzlaeuz. Duzdouq mbouj guenj “sam caet ngeihcib it”, gaemz heiq ndeu buet daengz haj laeuz, ngeux gyaeuj yawj, lienz ngaeuz duzgvi hix mbouj raen, duzdouq couh yietnaiq yaepyet. Yiet- naiq seiz, duzdouq ndawsim angqyangz siengj: Baez doxdax neix, gou hingz dingh lo. Yietnaiq gvaqlaeng, duzdouq sikhaek laebdaeb buet bae coh cib laeuz.

Buet daengz cib laeuz, duzdouq yawj raen duzgvi cingq naengh youq gwnz daengq caj swhgeij, duzdouq youh doeksaet youh geizheih, cam naeuz:“Mwngz baenzlawz beij gou vaiq ne?” Duzgvi vixvix baih henz, gangj:“Gou dwg naengh dendih hwnjdaeuj.” Duzdouq dingq le youh heiq youh gip, hoeng saw hingz gaenq dingh lo, bouxlawz hix mbouj ndaej laihdai,

Duzgvi youh hingz lo, duzdouq ndawsim damzbyoedbyoed: Yawj neix, siengj aeu hingz duzgvi lij aeu doenghdoengh uk cij ndaej bw!

（Vanzgyangh Mauznanzcuz Swciyen Sih’wnh Cin Yinzhoz Siuj- yoz seiq nienzgaep Cinz Gijvwnz boux lauxsae son’gyauq Veiz Gyah- manj）