“Simjmehveij!” Gou roengzrengz rex daiq hamj gvaq giemxdou, aj bak hemq coh ndawranz, “daiq gou daeuj yawj Ahveij lo!”

Doudangq deng biengj hai, Simjmehveij daj ndawrug byaij okdaeuj, iet song fwngz daeuj rex daiq naengh youq gwnzeij, gou haeujsim yawj Simjmehveij, raen lwgda de youh hoengz youh foeg, beij haxbaenh lij yienhda.

“Aiya, Daiqbyauh, gyo’mbaiq mwngz daeuj yawj……”

Gou bulu buet haeuj ndawrug, ndawde myoxmyad, gou raen Ahveij ninz youq gwnz congz youh gyangz youh ringx, byaij gyawj congz heuh de song sing, de vanzlij caengz rox miz vunz daeuj, gou roxnyinh miz di geizheih, iet fwngz rag fwngz de, sing loq sang cam:

“Ahveij, mwngz roxnyinh baenz- lawz yiengh lo?”

De mbouj ringx lo, da’ngwnh yawj gou, hanh gwnz najbyak naed- naed miz haeuxlidlu baenzneix hung.

“In, in ha!” De gaenj hemq, “Aiyo, in lai lo……”

Gou ca fwngzgvaz de yaek sijsaeq yawj gij baksieng lwgfwngz de seiz, de aeu fwngzswix roengzrengz baez nyoengx gou, sup dauq fwngzgvaz, song fwngz nyaenx dungx, swenj- yauyau dwk:

“Dungx gou in! Dungx gou in……”

“Ha?”

Gou doeksaet yat, riengjret cienq ndang buet ok rog bae, Simjmehveij cingq rex daiq yaek byaij haeujdaeuj, gou gyaeuj ndeu dawj haeuj ndaw- rungj Simjmehveij bae.

“Ahbyauh, ai——” Simjmeh- veij fwngz ndeu nyaenx aek bonjfaenh, fwngz ndeu rex begdou heuh le sing ndeu.

“Cuet, Ahveij dungx in, daiq!”

Gou hujdengdeng hemq, gaenq mbouj ndaej goq caeuq Simjmehveij boizleix lo.

“Ha? Dungx in?” Daiq saenz- dedded byaij coh naj congz.

“Haxbaenh de itcig heuh dungx in, aiq dwg gwn le ywdoj.” Simj- mehveij dauqfanj beij gou caeuq daiq lij caemdingh.

Daiq naengh youq henzcongz, rag fwngz Ahveij, youh lumhlumh najbyak de, Ahveij gwq fan bae foek dauq, ndawbak gyangz mbouj dingz.

Daihngeihsam Ciq Cax Gaj Vunz

Caemrwgrwg yaep he.

“Ai, din fwngz gyoetcaep, aen dungx ndaemqleq, gij ywdoj haenx mbouj deng, itdingh dwg——” Gij sing daiq miz di saenzdedded, gangj ndaej gaenjdwgdwg, “Ahbyauh, vaiq- di, vaiqdi bae ra bohgoux mwngz daeuj.”

“Aeu gou haeuj ndawsingz bae ra de?” Gou yaek yo din couh buet cam.

“Seizneix de wnggai gaenq dauqdaeuj lo, mbouj dauqranz, itdingh dwg youq ndaw hagdangz caeuq yaucangj laux gangjgoj? Vaiqdi buet bae, yied vaiq yied ndei!”

“Baenzlawz? Nanzdauh Ah- veij……”

Gou yamq ok giemxdou seiz, ndaejnyi Simjmehveij youh daej youh hemq, ndawsim gou doq suk baez he, gou lau Ahveij ok maz saeh, ndigah song ga buet yat lumj mbin, yienznaeuz gou bingzciengz mbouj haengj Ahveij geijlai, hoeng seizneix gou cix nyienh sai gij rengz sojmiz bae gouq de. Aulungzgveiz caen dwg vunzrwix, caen deng daiq ngeix dahraix, dungxsaej de beij duzngwzdoeg lij doeg, daeg- daengq aeu gij ywdoeg daeuj haih dai Ahveij, boizhaemz Simjmehveij……

(caengz sat)