Bihaenx, daxmeh ngamq ndaej 25 bi, baenzlai lwg aeu ciengx, gij ndwenngoenz ranz dou sikhaek couh gvaq mbouj ndaej roengz lo. Gyo- mbaiq bungz bohlaeng, doeklaeng daxmeh gaijhaq hawj bohlaeng, boh- laeng hix nyienh ciengx dou sam cejnuengx.

Bohlaeng heuhguh Lanz Dwz- guih, dwg vunz Hozciz Si Duh’anh Yauzcuz Swciyen. 1951 nienz 1 nyied, de camgya Cunghgoz Yinzminz Ciyenginh, riengzlaeng bae coh Cauzsenj camgya Gang Meijgoz Bang Cauzsenj Cancwngh. Gaxgonq de guh boux bubingh, doeklaeng gaij guh baubingh. De guh boux bubingh, caeuq gyoengq canyouj gaj vunzdig lumj gvej em nei, lae lwed lae hanh; guh boux baubingh, de caeuq canyouj dox boiqhab, dwk bau boedboed caq vunzdig. Youq ndaw hoenxciengq, de maenh’ak fouzbeij, laeb goenglauz gvaq, hix deng sieng naek gvaq, ndaej nyinhdingh dwg ndangcanz sam gaep. Aenvih de ndeimaenh, 1954 nienz, ndaej miznaj gyahaeuj Cunghgoz Gungcanjdangj.

1956 nienz 4 nyied, de daj budui cienjnieb, ndaej anbaiz daengz Liujcouh Si Ganghdezcangj guhhong. Gvaqlaeng, baihgwnz baij de daengz Lozyez Yen guhhong. De mbouj gangj vah’ienq, daiq geij cib boux vunz bae daengz Lozyez Yen Swnhlinz Gunghyezgiz guhhong (seizneix dwg Gvangjsih Bouxcuengh Swcigih Goz- youj Yajcangz Linzcangz), youq giz- neix baez guh, couh itcig guh daengz duiyouh.

Youq ndaw linzcangz fwj heux mok geuj, bohlaeng yienznaeuz guh lingjdauj, hoeng de caeuq lajfwngz itheij hoh faex re feiz, fungj faex ndaem miuz, fag faex doek ceh, vih guekgya canh ngaenz, vih linzcangz aeundaej haujlai mingzdaeuz. De mbouj lau gwn haemz mbouj lau gwn hoj bae guhhong, ciengzseiz ndaej bingzguh bouxvunz senhcin caeuq boux gungcanjdangjyenz ndeimaenh, baenz gij yienghndei vunzlai. Gij saekloeg buh bouxbing caeuq gij saekloeg ndoengfaex doxdoengz, doengzcaez yungz haeuj ndaw ndang de bae, doengzcaez gaek haeuj ndaw ndok de bae.

Miz baez ndeu, youh bingz de guh boux gungcangjdangjyenz ndei- maenh, lij miz ngaenzciengj hajcib maenz. Lai baez heuh de bae lingx gij ngaenzciengj neix, hoeng, de cix giengiet doi naeuz:“Gou mbouj aeu. Gij ngaenzciengj neix louz hawj gyoengq vunz engq aeu yungh roxnaeuz giz linzcangz aeu yungh ba!” 20 sigij 60 nienzdaih, hajcib maenz dwg ngaenz lai raeuh lo! Seizneix haujlai vunz nyinhnaeuz de baenzneix guh bamz lai, hoeng neix couhdwg bohlaeng gou, dan guh saeh ndwi, mbouj ngeix ndaej ciengj ndaej ngaenz, de itcig dwg aen yienghndei gou.

Gij bouxbing camgya gvaq Gang Meijgoz Bang Cauzsenj, duivuj le ndaej yiengjsouh di cwngcwz ndei. Hoeng bohlaeng gou itcig daengz gvaqseiq, hix mbouj ndaej yiengjsouh gvaq. De bonjfaenh coengzlaiz mbouj bae ceng’aeu gijneix gvaq. Gou siengj: Ndawsim de itdingh lumj haujlai bouxbing laux nei, mbouj caeuq guekgya heuh aeu neix aeu de, mbouj siengj hawj dangjcujciz dem fanz dem you. Couh lienz gep baizbenj iqetet “Aenranz Miznaj”, hix dwg de gvaqseiq song ndwen le cij soengq daengz ndawranz caemhcaiq venj hwnj gwnz bakdou bae.

Bohlaeng yienznaeuz mbouj dam cam mingzleih, hoeng ciengzseiz geiq ndaej caeuq vunz doxndei doxhuz. Mwh gou lij iq, baez gvaq cieng, gaj moucieng seiz, bohlaeng cungj bae heuh ranznden daeuj, doengzcaez gaj moucieng faen nohmou. Engqlij boux vunzseng gvaq najdou, de hix nyienh soengq di noh moucieng. De naeuz gvaqcieng ndaej gaj mou、gwn nohmou dwg gij saeh angq saeh git, aeu hawj caezgya caez daeuj cimz. Gij boek- saed、ndatcingz bohlaeng yingjyangj gou laegled, hawj gou engq rox gij dauhleix guh vunz guh saeh.

Neix couhdwg bohlaeng gou, dwg bouxbing mbouj lau dai mbouj lau sieng, dwg bouxhenbya youq ndaw ndoengfaex gaenxguh cix lumzseuq mingzleih, engq dwg boux daxboh simndei simsienh.

Song daxboh gou yienznaeuz caeux couh gvaqseiq, hoeng cix vih dou yienh’ok gij bonjsaek bouxbing caeuq boux gungcanjdangjyenz. Song- de dwg gij cansw gunghozgoz, youh dwg bouxguhhong vih yinzminz. Songde maenh’ak mbouj lau dai, mbouj miz seisim cij ngaemgyaeuj gaenxguh, gij cingsaenz songde aeu geiq ndawsim, hag gij yiengh songde!

（2 sat）