Seizneix, cingq dwg seiz lwgmanh baenz, Duh’anh Yauzcuz Swciyen Cinghswng Yangh ndaw dieggoek ndaem lwgmanh, lwgmanh gogo dawz aen“hoengzfwdfwd”. “4 nyied ndaem lwgmanh, aenvih cwngcwz ndei, nungzyez gisuzyenz son ndaej rox, lwgmanh baenz lai, yiengh ndei, lauxbanj youh daengz bakdou ranz soucawx, gou baez nduj mbaet gai ndaej 1500 lai maenz.” Cinghswng Yangh Dwnghliz Cunh boux duet- dungz Lanz Aigyauh cingq mbaet lwgmanh naj riunyumnyum naeuz.

Bineix doxdaeuj, aen yangh neix baengh seizndei baihdoeng baihsae doxgap, ciuq “cihbu+gunghswh+nungzhu” hwngfat vunqsik, gaenx- maenx diuzcingj ndaem doenghgo, dazyinx bouxguhnaz ndaem lwgmanh yungh cienz noix、raen cienz vaiq、ndaej cienz lai haenx, hwnqbaenz dieggoek ndaem lwgmanh 58 moux, doxlienz nungzhu 32 ranz, doenggvaq dinghdan soucawx caeuq youq gyawj guhhong, mboujdan hawj nungzhu miz souhaeuj, engq ndaej daiq- doengh canjnieb hoenghvuengh caeuq gyamaenh duetgungz cwngzgoj, bang- doi saenqhwng lajmbanj.

“Yamq laeng, dou yaek dazyinx nungzhu byaij diuzroen rox gohyoz、ciennieb dajndaem, caenh’itbouh gyalai najdieg ndaem lwgmanh caeuq lai miz gohyoz, hawj engq lai vunz ndaem lwgmanh ndaej ik, ndwen- ngoenz gvaq ndaej hoengzfwdfwd lumj lwgmanh nei.” Cinghswng Yangh Dangjveij suhgi Yangz Yenz naeuz.

(Lanz Yi Vangz Lidingz)