“Daiq, Aulungzgveiz gig gyo- mbaiq bohgoux ne! De naeuz bide danghnaeuz mbouj dwg bohgoux oknaj bang de youq laeng miuhsaenzvuengz hwnj aen ranzdaemq he, de lij ninz youq gwnz mbaeklae naj miuh o.”

“Ai, gyo’mbaiq? De gangj ndaej soengswt, bide bohgoux mwngz hix mbouj rox deng geijlai vunz ndaq! Vunzmbanj cungj mbouj doengzeiq hawj Lungzbyauh ce youq ndaw- mbanj, maqmuengh de caeuxdi dai, hoeng mingh de raezrangrang, dauqfanj lix ndaej lumj duzvaiz.”

“De ndoet laeuj gwn mbei ngwzdoeg ne.”

“De couhdwg duz ngwzdoeg ndeu, bohgoux mwngz hix dwg rasaeh, ce de youq ndawmbanj, couh lumj ce duz ngwzdoeg nei, baenzbaenz cungj yaek haeb vunz—— Ai, mbouj rox Ahveij gwn ywdoj le baenzlawz yiengh lo? Gou haxbaenh lij siengj: Lungz- byauh simsaej ndaemfoux, itdingh haemz dai mehlwg Ahveij lo, saek- laeuq de……”

“Danghnaeuz De daegdaengq aeu di ywdoj loengh dai Ahveij?” Gou doq ciengj coenz vah daiq cam.

“Mwngz naeuz de rox mbouj rox baenzneix guh? Gou cungj miz di ngeizvaeg, haxbaenh mbouj wnggai bae ra de aeu ywdoj.”

“Haxbaenh Simjmehveij gag bae ra de aeu ywdoj, de hainduj lij mbouj nyienh hawj ne.”

“Ai! De baenzlawz ndaej caen- ndang bae ra Lungzbyauh ne? Caen dwg fatbag, boux mehmaiq coz——”

“Simjmehveij naeuz de vihliux Ahveij, maz cungj mbouj dam lo.”

“Saejlaet! Fatbag!”

Daiq daj gwnz eijgvaengx ndwn hwnjdaeuj lo, de gig hozgaek, fajfwngz mbouj dingz bek gwnzdaiz, lumjnaeuz ienq Simjmehveij mbouj wnggai vih daeglwg de gag bae gouz Aulungzgveiz aeu ywdoj, gou youh mbouj doengzeiq gij yawjfap daiq lo, hoeng raen daiq baenzneix gikdoengh, gou mbouj gamj dwen.

“Doeklaeng, vihmaz youh hawj ywdoj lo?”

Daiq fwngz ndeu dawz doengzien, dauqcungz naengh roengzdaeuj, gou doq coux gvaq diuz ceijdwkfeiz haeuj ranzcauq bae dwk feiz, buet dauq ndenq ceijdwkfeiz hawj daiq dap naeuz:

“Doeklaeng Simjmehveij heiq- hwnj fofo deuz lo, Aulungzgveiz cij dawz song bau ywdoj okdaeuj, heuh gou soengq bae hawj Ahveij.”

“De mbouj gag soengq bae, heuh mwngz soengq?”

“De naeuz gou buet ndaej vaiq.”

“Ndawde miz yaemmaeuz!”

“Baenzlawz?”

Daiq cit doengz ien ndeu caengz liux, couh ndaep ceijdwkfeiz bae lo, de cuengq doengzien roengz, ndwn hwnjdaeuj fwngz ndeu coq youq gwnz mbaq gou, gaenj naeuz:

“Vaiqdi, raeuz daengz ranz Ahveij bae yawjyawj.”

Gou caeuq daiq doxlumj, hix simgaenj raixcaix, rex daiq doq byaij bae ranz Ahveij.

Daiq deng ciemxdin gvaq, bingzciengz cawz le bae ndawmiuh hwnjyieng, gig noix ok doulaux yamq ndeu, gij roen ndawmbanj dingzlai dwg aeu ndaekrin caeuq cien daeuj bu baenz, gumxgemx dangqmaz, gig nanz byaij, din iq daiq caij youq gwnzde, ndang de bibi buengqbuengq, dangh- naeuz mbouj dwg gou rex de, hix mbouj rox aeu byaij geijlai nanz cij byaij daengz ranz Ahveij.

(caengz sat)